Вредноста на Zynga, чии игри се FarmVille, MafiaWars и слични друштвени мали игрички кои најчесто ќе ги најдете на Facebook, се проценува на 5.51 милијарда долари, според берзата за акции на приватни компании, SharesPost Inc.
Еlectronic Arts со своите наслови Fifa 11, Need for Speed, the Sims… вреди 5.22 милијарди долари, според Nasdaq берзата.
Тоа што е поинтересно е што Zynga е компанија основана пред 4 години додека Electronic Arts постои од 1982 година. Ова и споредбата на вредност јасно ја покажува популарноста и капацитетот на друштвениот гејминг.
Додека просечниот гејмер ќе се анагажира околу покласичните видео игри барајќи подобра графика, покоплициран гејмплеј, друштвените видео игри ќе ги привлечат, не само гејмерите, туку сите кои сакаат да се забавуваат со пријателите. Zynga игрите се појавуваат по друштвените мрежи како Facebook каде има над 500 милиони корисници. На таа платформа Zynga држи 1/3 од пазарот, a нејзините игри се меѓу најпопуларните апликации на Facebook и привлекуваат 210 милиони корисници месечно.
Најновиот EA хит – Fifa 11
Zynga игрите вклучуваат и виртуелни богатства за реални пари. Пример, корисникот може постојано да троши пари за да си го подобри гејминг искуството или пак да купи виртуелни поклони за своите пријатели.
Но и EA не е далеку зад друштвениот гејминг. Тие се ангажираат во мобилниот гејминг, купувајќи го Playfish и Chillingo.
Сепак Zynga и Electronic Arts се само трети и четврти на листата на највредните гејминг компании. Activision вреди 13.9 милијарди, додека кинеската Tencent Holdings која нуди веб игри и инстант месенџери и други веб услуги се проценува дека вреди над 43 милијарди долари.
