Доколку играте видео игри, нема шанси да немате слушнато за Vampire Survivors. За нешто повеќе од половина година, оваа игра стана ултра популарна од две причини: воошто не е скапа и е неверојатно забавна. Засновајќи се на едноставен принцип со управување уникатни и моќни ликови кои автоматски пукаат и активираат специјални способности и моќи, Vampire Survivors покажа дека голема забава може да се најде во мало пакување и уште поминималистички гејмплеј.
Поради таа причина, 98% од рецензиите се позитивни. За тие 2% од гејмери кои оставиле негативна рецензија сакаме да мислиме дека се незадоволни само бидејќи играта овозможува уништување вампири во ретро-инспирирана графика. Yet Another Zombie Survivors се чини дека е тука да ја задоволи и таа таргет група и фрла илјадници зомби чудовишта во модерен и визуелно импресивен графички енџин.
Безумна забава
Нема никаква длабока филозофија во Yet Another Zombie Survivors. Приказна, што беше тоа? Ова е игра во која акцентот е на брза, динамична и адреналинска акција и се нема време тука за објаснување за вирус кој се шири низ светот и ја инфицира и мутира популацијата. Не не, тоа што било – поминало, а она што треба е да се стави крај на сè што ќе се осмели да се приближи кон вас! Па така, на мапата секогаш навлегувате со еден војник но, со секоја помината минута притисокот се зголемува а бројот на непријателите расте. Ваша задача е да ги избегнувате непријателите. Ништо повеќе! Војникот кој го управувате автоматски пука и активира способности и опрема.
Од време на време, низ мапата добивате помош во форма на кутија или специјалисти. Доколку отворите кутија, ќе можете да активирате најразлични способности, како регенерација на здравје, поголема брзина, подеструктивни оружја и слично. Ако ослободите специјалист, ќе можете да одберете да ви се приклучи уште еден војник. Мора да потенцираме дека војниците се уникатни во секој можен поглед и користат различни оружја, опрема и способности.
SWAT војникот користи пиштол, кој подоцна се надградува во SMG, а тенкот користи различни форми на деструктивни сачмарки. Слично на ова, еден војник може да фрла гранати во спротивен правец, друг да поставува ротирачки пили кои сечат сè што ќе им се најде на патот. Способностите не само што се исклучително корисни, туку и се визуелно импресивни, сеејќи експлозивен хаос и деструкција на бојното поле.
Надградување на овие способности ги прави војниците да бидат нешто најблиску до несопирлива сила, особено кога стотици и стотици зомби чудовишта ќе почнат да ги опколуваат од сите страни. Паралелно со ова, имате на располагање и способности како воздушни напади од хеликоптери, поставување најразлични кули, мини и слично.
Овие надградби и способности се нудат по принцип на случаен избор и нивното отклучување ви се нуди секојпат кога ќе соберете доволно искуствени поени. Ваквите поени можете да ги соберете со убивање зомби чудовиштата. Полесните непријатели пуштаат помалку поени, а босовите значително повеќе. Тука и таму, некој непријател може да испушти и штит, поефикасно пукање, автоматско собирање искуствени поени, лечење, пари и случни работи.
Сигурна смрт
Една работа е загарантирани во Yet Another Zombie Survivors – порано или подоцна, ќе умрете. Бројот на непријателите и нивната издржливост знае да се искачи до точка каде нема да можете нити лесно да ги убивате нити лесно да ги избегнувате. Но, со секоја наредна партија, која секогаш ја почнувате од нула, ќе можете да издржите повеќе време од порано. Ова се должи на уникатните способности кои ги отклучувате со горе-споменатите пари.
Откако ќе бидете убиени, од главниот центар ќе можете да отклучувате трајни, пасивни бонуси. Некои од ваквите бонуси, ви дозволуваат да собирате повеќе искуствени поени, а некои да сте побрзи, поиздржливи и поефикасни во убивањето.
Моментната верзија на Yet Another Zombie Survivors е 0.2.2 што значи дека играта добрва ќе се менува и проширува со модови, иако, искрено, освен дополнителни мапи, не знаеме што уште би и фалело. Играњето е флуидно, одлично оптимизирано, а механиките се прочистени до форма на совршенство. Во ниеден момент не наидовме на некаков проблем, а сите гејминг сесии беа почнати и завршени со огромно уживање. Awesome Games Studio навистина е awesome и можат само да се гордеат со нивното најново чедо. Доколку сте фанови на Vampire Survivors и барате достојна алтернатива, нема да погрешите со YAZS!
Повеќе детали за играта
- Произведува: Awesome Games Studio
- Издава: Awesome Games Studio
- Жанр: Action Roguelike, RPG, Bullet Hell
- Платформа: Microsoft Windows,
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
