Носталгијата знае да биде исклучително моќна, особено за децата од осумдесетите кои израснаа со бројни аркадни игри. Во едно многу далечно време, флиперите беа најпопуларната форма на интерактивна забава и пријатно се потсетуваме на бројните моменти поминати со Кадилак, Стрит Фајтер, Панишер и ред други.
Колекција од помалку познати наслови
Она што не паметиме се игрите кои се наоѓаат во VISCO Collection – колекција од седум класични аркадни игри кои некако не заживеаја на нашата територија. Тоа не значи дека не би можеле сега конечно да навлезете во нив и да пробате да се присетите на добрите стари времиња каде убавината беше во едноставни, но предизвикувачки игри.
Достапна за PC и конзолите, VISCO Collection им дозволува на носталгичните гејмери да запливаат во една од седум игри:
- Andro Dunos: side-scrolling shoot ’em up авантура во која се спротивставувате против бројни вонземјани и босови
- Bang Bead: Боречка игра каде во стилот на Стрит Фајтер, одбиррате играч и започнувате впечатливи битки со бројни комбо движења
- Captain Tomaday: пукачка и крајно предизвикувачка авантура во која се трансформирате во најразлични форми
- FlipShot: Против вашите пријатели или против ВИ-контролирани противници започнувате научно-фантастичен спин на pinball!
- Ganryu: Ова е играта за вас доколку некогаш сте сакале да ставите крај на бројни нинџи и чудовишта
- Goal! Goal! Goal!: Фудбал. Не сме преголеми фанови, но не можевме да не останеме рамнодушни на играта. Има интересни можности за бирање тимови и впуштање во тензични натпревари
- Neo DriftOut: Последна, седма игра се посветува на сите тркачки ентузијасти кои живеат за давање гас до даска и тркање низ предизвикувачки терени
Ние ја проверивме VISCO Collection на PS5 и сме релативно задоволни од глаткото искуство. Единствено нешто што не ни се допадна е тоа што играта не е на цел екран и страда од пониска резолуција која се поставува на само дел од екранот: останатиот дел е статична слика која е замислена да изледа како дел од самиот флипер.
Искрено се сомневаме дека би можеле да уживаат помладите гејмери во она што VISCO Collection нуди, но возрасните гејмери кои ја имале честа да бидат деца во осумдесетите и раните деведесети – тие, тие би можеле да најдат нешто исклучително пријатно во колекцијата.
Повеќе детали за играта
- Произведува: QUByte Interactive
- Издава: QUByte Interactive, PixelHeart
- Жанр: акција, тркање, борби, спорт
- Платформа: Microsoft Windows, конзоли
- Излезена на: 26 октомври 2023
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
