Костадин Ристовски барем по формалното образование веројатно не е некој од кој би очекувале дека ќе креира видео туторијали за програмски јазик. Сепак тој е потврда дека во денешно време на сите ни е потребно програмирање без разлика во која индустрија работиме. Видеата се за веројатно најпопуларниот програмски јазик во моментов и можеби дискутабилно, но Python е најдобриот јазик за почетници.
Python почнав да учам како хоби, бидејќи е релативно лесен јазик за разбирање, што е одлично за почетници, но е доста моќен па затоа истиот се применува во голем број различни сфери. Иако работам во областа на финансии/сметководство, овој програмски јазик ми овозможи да автоматизирам дел од задачите кои ги имав на работните места.
Идејата е првиот курс да биде за почетници, но во идина г. Ристовски најавува отворање на неколку различни теми наменети за понапредни корисници „Python libraries“, и тоа:
- Matplotlib (наменета за визуализација);
- Numpy/pandas (наменета за обработка на податоци);
- Tweepy (поврзување на Twitter API со Python);
- Kivy (наменета за креирање апликации);
- Pygame (наменета за креирање на игри);
- Scrapy/BeautifulSoup (наменета за т.н. webscraping)
Во првото видео може да се запознаеме со основните податоци за јазикот и инсталација на основните потреби за програмирање во Python. Секако првиот туторијал не може да помине без традиционалниот „Hello World“ код.
