Креаторот на Assasin’s Creed и Far Cry, Ubisoft, во соопштение побара од своите играчи да си ги сменат лозинките за да се заштитат од сајбер-криминалците кои „нелегално пристапиле“ до кориснички имиња, имејл адреси и енкриптирани лозинки. Ubisoft има околу 58 милиони играчи, но не се знае точно колку профили се пробиени. Студиото негираше дека се пробиени кредитните и дебитните картички.
Првите сомнежи беа дека хакерите ја пробиле Uplay платформата за симнување на игри, бидејќи истата таа платформа имаше ранливост пред една година, а во април беше откриено дека преку неа можат да се симнуваат игри без да се плати. Сепак, француското студио негираше дека Uplay е пробиен, иако не ни откри како се случил хакот. Соопштението вели дека нивен сајт е пробиен за да се добие пристап до онлајн систем. Хакерите ги пробиле првин корисничките профили – чии мејлови може да бидат злоупотребени за спам – за да добијат пристап до „нелегален пристап до онлајн мрежата“.
Иронично, забележува Guardian, студиото заедно со експерт од Kaspersky Lab работи на нова игра Watch Dogs во која главни протагонисти се хакери.
