The House of Da Vinci е VR игра која ќе ве префрли во ренесансната Фиренца и ќе ви понуди комплексни можности за впечатливо истражување на светот и генијалните изуми на еден од најистакнатите умови во историјата. Оваа авантуристичка игра со загатки, развиена од инди тимот Blue Brain Games, обезбедува уникатно искуство во доменот на виртуелната реалност. Играјќи како чирак на Леонардо да Винчи, потребно е да пробате да го замените неговото место, навлегувајќи, притоа, во авантура полна со интригантни мистерии, генијални инвенции и внимателно скриени предмети.
Во The House of Da Vinci VR имате за задача да решавате комплексни механички загатки. Голем дел од нив се директно инспирирани од автентичните пронајдоци и дизајни на Леонардо. Какои и да е, од вас се бара внимателно да набљудувате и да користите логичка дедукција со цел успешно да манипулирате со сложени запченици, лостови и други механизми. Клучен елемент во механиката на играта е уникатен уред кој ви овозможува да добиете увид во минатите настани.
Оваа функционалност обезбедува суштински информации и траги, кои се од витално значење за разоткривање на комплексните мистерии и за напредок низ наративната структура. Интеракцијата со околината е дизајнирана да биде интуитивна, овозможувајќи ви да симулирате тактилна интеракција со загатките и пронајдоците, што е овозможено преку имерзивната природа на виртуелната реалност. За да успеете во целта, детално ќе истражувате воени машини, прецизно изработени кутии со комплексни брави и целосно имерзивни сценарија за бегство од соби, сите конципирани да го рефлектираат инженерскиот и уметнички гениј на Да Винчи.
Играта со голема верност ја рекреира атмосферата на Фиренца од 16-тиот век, вклучувајќи локации инспирирани од оригиналните уметнички дела на Леонардо и автентичната архитектура на историскиот град. Визуелниот дизајн е на високо ниво, карактеризиран со текстури со висока резолуција и детално моделирани објекти кои значително придонесуваат за чувството на целосна имерзија. Секоја просторија и секој механизам се изработени со исклучително внимание посветено на деталите, со што се создава автентично ренесансно доживување. Почнувајќи од работилницата на Леонардо, па сè до скриени крипти и внимателно дизајнирани дворови, секоја локација претставува нови предизвици и можности за откривање. Имено, дури и корисничкиот интерфејс на играта, односно менито, динамично се менува помеѓу одделните поглавја, рефлектирајќи го протокот на времето и развојот на наративните случувања, што дополнително ја продлабочува имерзивноста на целокупното искуство.
Blue Brain Games, тимот одговорен за развојот на оваа игра, е составен од искусни графички уметници и програмери, чија заедничка пасија се 3D игрите со загатки. По успехот на оригиналната игра The House of Da Vinci, која беше успешно финансирана преку Kickstarter платформата кон крајот на 2016 година, тимот реши да понуди поимерзивно искуство со помош на виртуелната реалност. Во случај да заглавите некаде, а, сигурно ќе заглавите бидејќи играта е предизвикувачка, имате интегрирано и систем за помош кој нуди суптилни насоки, без притоа директно да го открива решението на загатката.
The House of Da Vinci VR претставува импресивно и интелектуално стимулирачко патување во светот на Леонардо да Винчи. Преку својата успешна комбинација на историска автентичност, комплексни загатки и иновативна примена на технологијата за виртуелна реалност, играта нуди уникатно и ангажирачко искуство за љубителите на мистерии, историја и, секако, на ликот и делото на самиот Да Винчи.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
