Едвај по месец и половина од првата најава, Tesla Motors ги претстави батериите за домовите – Powerwall. Батериите треба да бидат енергетска резерва за соларните ќелии во периодот кога не е сончево, кога за напојување не може да се користи сончева енергија. Батериите ќе бидат и резерва во периодите кога ќе има прекин во напојувањето со електрична енергија.
Сепак идејата зад батеријата е далеку поблагородна – ослободување од зависноста од фосилните горива, а со тоа и намалување на загадувањето. Батеријата е прв чекор кој би овозможил нулта-емисија на гасови при производство на електрична енергија, вели Tesla Motors. Само во САД изминатата година при производство на електрична енергија, како нус-производ се ослободени 2.000 метрички тони CO2.
Батеријата за домот е базирана на батериите за Tesla возилата, доаѓа со 10KWh за бекап примена или со 7KWh оптимизација за секојдневна примена. Првата оптимизација е направена за работа во електрична мрежа и се вклучува во случај кога има прекин на електрична енергија. Втората 7KWh оптимизација е направена за работа со соларни панели и овозможува напојување во случај кога не може да се користи сончева енергија. Цената на системите е 3.500 долари за 10KWh и 3.000 долари за 7KWh систем. Цената е без вклучени инвертор и инсталација, што би можело значително да ја покачи цената на целокупниот систем. Добра вест е што системот ќе функционира со голем дел од поестоечките инвертори, па за дел од корисниците кои веќе ја користат сончевата енергија нема да има потреба од дополнителен трошок.
