Новата Tesla нема волан, педали и не и треба возач

Tesla официјално го претстави Cybercab, својот нов автомобил дизајниран од почеток за автономно возење и роботакси услуги. Возилото, кое првпат беше прикажано како концепт во 2024 година, сега започнува да се појавува на улиците на Остин, Тексас, како дел од постепеното проширување на автономната услуга на компанијата.

Cybercab е веројатно најрадикалниот автомобил што Tesla го има пуштено во реална употреба досега. Нема волан, нема педали, а во кабината има простор само за двајца патници. Наместо возач, автомобилот се потпира на системот за автономно управување на Tesla.

Според Reuters, првите возила веќе започнаа со ограничени автономни возења во Остин. Најголемата разлика во однос на досегашните Tesla модели е тоа што Cybercab не е автомобил кој едноставно има напреден систем за асистенција на возачот. Тој е конструиран со идејата дека човекот воопшто нема да управува со возилото.

Возилото користи камери и невронски мрежи за навигација, без радар или lidar, што е различен пристап од оној на конкуренти како Waymo и Zoox. Според The Verge, Cybercab има осум камери и се потпира на Tesla’s vision-based систем за движење низ сообраќајот.

Токму ова е и една од најголемите точки на дебата околу возилото. Tesla со години го развива својот Full Self-Driving систем, но неговата сегашна верзија сè уште бара внимателен возач и не претставува целосно автономно возење во сите услови. Cybercab, од друга страна, е замислен за ситуација во која патникот едноставно влегува, ја избира дестинацијата и автомобилот го прави останатото.

Помал почеток од очекуваното

Иако сопственикот Илон Маск со години зборува за огромна автономна флота, реалноста засега е значително поскромна. Tesla моментално има ограничена роботакси услуга во неколку американски градови. Во Тексас се регистрирани 420 автономни Tesla возила, од кои 45 се Cybercab модели, според податоците цитирани од Reuters. За споредба, Waymo веќе управува со илјадници автономни возила.

Tesla сепак планира значително да го зголеми бројот на Cybercab возила. Производството започна во 2026 година, а компанијата гради капацитет кој би можел да произведува повеќе од 125.000 возила годишно.

Тоа е важен момент бидејќи Cybercab не е замислен само како уште еден модел во понудата на Tesla. Компанијата сака од него да направи основа за цела автономна транспортна мрежа. Најголемата пречка можеби нема да биде технологијата, туку регулативата.

Автомобил без волан и педали не се вклопува лесно во постојните безбедносни стандарди. Американската Национална администрација за безбедност на сообраќајот, NHTSA, веќе започна проверка на околу 1.000 Cybercab возила поради прашања поврзани со усогласеноста со федералните стандарди.

Агенцијата особено го разгледува фактот што возилото нема традиционални рачни контроли, како волан, педали и ретровизори. Ова значи дека Tesla може да има функционален автомобил, но сепак да не може едноставно да го пушти во масовна употреба на сите пазари.

Многу повеќе од автомобил

Cybercab доаѓа во период кога Tesla има потреба од нов извор на раст. Компанијата и понатаму заработува главно од продажбата на Model 3 и Model Y, но конкуренцијата на електричниот автомобилски пазар станува сè посилна.

Според Reuters, продажбата на Tesla возила произведени во Кина во август пораснала само 3,6 отсто на годишно ниво, значително помалку од растот од 38 отсто во јули.  Затоа Cybercab е многу повеќе од нов автомобил, односно за Tesla ова е обид да се премести тежиштето од класичен производител на електрични возила кон компанија која заработува и од софтвер, автономно возење и роботакси услуги.

Првите возења во Остин се важен чекор, но вистинскиот тест ќе биде кога Cybercab ќе треба да функционира во илјадници возила, во повеќе градови, под различни временски услови и со регулатори кои не се подготвени автоматски да ги прифатат ветувањата на компанијата.