Што ќе ви сe Google Glass кога се забранети насекаде?

Но, каде можат да се користат Glass? Каде е дозволено да снимате се што гледате без да се грижите дека ќе ја нарушите приватноста или ќе му наштетите некому? Според FastCompany, нема многу такви места. Театрите и кино салите ќе ги забранат уредите поради страв од пиратерија. Училиштата ќе ги забранат поради заштита на малолетниците. Нема да смее да се вози автомобил бидејќи очилата го намалуваат видикот и го одвлекуваат вниманието. Не смеат да се користат ниту во болниците бидејќи таму се чуваат лични податоци и многу болни одбиваат да бидат снимани во таква состојба. Снимање во банките и банкоматите е секако проблематично поради очигледните причини. Бутиците каде се пресоблекуваат луѓето, базените, стриптиз баровите и секое друго место каде може да има голи луѓе секако дека ќе ги забранат наочарите. Баровите и рестораните веќе ги забранија бидејќи луѓето не сакаат да бидат снимани додека јадат или се во пијана состојба. Тогаш, дали останува да ги користиме очилата само во својот двор?

Звучи проблематично, но Popular Science вели дека решението се крие во индикатор со црвено светло на очилата кое ќе свети кога е вклучена камерата. Така барем другите луѓе околу корисникот со наочарите ќе знаат дека се снима, како што знаеме дека се фотографира кога ќе видиме некој со апарат.

„Google Glass е помалку ефикасен уред за набљудување од паметен телефон, освен едно нешто: не мора да го вадите од вашиот џеб или торба. Опасно е да заземаме позиција дека Google Glass е невин уред креиран според научно-фантастичните сонови и добри намери, но не мислам дека неговата забрана е правиот потег, добро е барем да се дискутира за тоа.“, пишува магазинот.

Google е свесен дека Glass се нов општествен преседан. Иако Ерик Шмит од Google еднаш рече дека ако имате што да скриете не треба да бидете онлајн, сепак за Google Glass, кои ја пренесуваат технологијата во офлајн светот, неодамна рече дека ќе мора внимателно да се размисли за како да се заштити приватноста. Одговорноста, вели тој, пред се лежи кај Google „да разбере што правиме, како го правиме тоа и да се однесуваат соодветно според нормите“.