Уште една недела пред нас и уште три игри кои решивме да препорачаме да ги проверите неделава. Независно од тоа дали сте по 4Х стратегии, акциони RPG игри, или пак детективски симулации од осумдесетите години на минатиот век, одбравме нешто што (не) би требало да проверите деновиве!
Revival: Recolonization е одлична Turn-based стратегија која неодамна излезе од раниот пристап на Steam
Од развојното студио HeroCraft PC, доаѓа феноменална grand стратегија која е сместена во пост-апокалиптична верзија на планетата земја. Како стратегија која ги запазува четирите X, односно Explore, Expand, Exploit, Exterminate, Revival ви дозволува да истражувате, да се ширите, да експоатирате и да истребувате низ клучни временски периоди.
Една од клучните точки во Revival е да ви наметнува неочекувани услови на кои морате соодветно да се прилагодувате. Па така, во еден момент, ќе биде забрането да користите одредено оружје, а, во друг, ќе морате да излезете на крај со непредвидливите елементарни непогоди. Поради ова, ќе бидете принудувани да правите соодветни штитови или пак да прифаќате одредени благослови.
Не само што вашата цивилизација значително се менува низ временските периоди, но слично е и со армијата со која управувате. Со текот на времето, ќе научите како да ги опремувате единиците со соодветна опрема која или ги наоѓате низ светот или пак ја крафтате.
Штотуку излезената 1.0 верзија се одликува со петмина уникатни претставници, подобрена вештачка интелигенција, како и подобрен систем со едикти. Покрај нови единици, светот е проширен со нова мапа, проширени можности за дипломатија, и многу повеќе!
Revival: Recolonization има скоро 80% позитивни рецензии и топло ја препорачуваме да ја проверите, моментно се продава со попуст од 25%.
Повеќе детали за играта
- Произведува: HeroCraft PC
- Издава: HeroCraft PC
- Жанр: стратегија
- Платформа: Microsoft Windows
- Излезе на: 11 април 2024
Fractals of Destiny е игра која убаво изгледа, но лошо се игра
И од трејлерите, и од скриншотите, имавме првичен впечаток дека Fractals of Destiny ќе биде интересна игра со неисполирани механики, но голем потенцијал. За жал, проценката не ни беше на место.
Иако Fractals of Destiny изледа убаво, се игра исклучително проблематично, со бројни багови, неинспиративна приказна, просечни гејмплеј механики и болно лошо одлуки во поглед на дизајнот на нивоата.
Развојното студио KRAKATOA STUDIOS гледа на Fractals of Destiny како на хибридна RPG игра која има „епска“ приказна измешана со „најдобрите“ механики кои произлегуваат и од акциони и од класични RPG игри. Нема ништо ниту епско ниту (нај)добро во Fractals of Destiny.
Се е под просекот, почнувајќи со долги, неинспиративни секвенци кои не можат да се скокнат, спори борбени механики кои трапаво се одигруваат пред вас и основни, исклучително „лесни“ RPG механики.
Кога на претежно негативните рецензии ќе прикачите и цена од 30 евра, Fractals of Destiny се чини како игра која, сега-за-сега, не е лошо да биде скокната. Да се надеваме дека студиото ќе продолжи да работи на играта и ќе ги исправи поголемите проблеми.
Повеќе детали за играта
- Произведува: KRAKATOA STUDIOS
- Издава: KRAKATOA STUDIOS
- Жанр: акциона RPG игра
- Платформа: Microsoft Windows
- Излезе на: 6 април 2024
Giveaway за Rough Justice: ’84, амбициозна и уникатна игра со примеси на истрага и time management!
Кога неодамна пишувавме за Rough Justice: ’84, го прикажавме чедото на Gamma Minus UG како невообичаена TM игра со комплексни примеси за истражување, правилно советување на вашите агенти, користење соодветна опрема, но и тестирање на нивните вештини. На располагање имате бројни договори. Од вашата правилна организација на агентите ќе зависи успехот на секоја од понудените мисии.
Rough Justice: ’84 е една од ретките игри кои ви покажуваат колку е важно да се има вистински тим за одредена мисија. Поради тоа, ќе морате и редовно да ги надградувате нивните уникатни способности. За пофалба се и бројните загатки и мини игри кои се осмислени во духот на осумдесетите. Доколку носталгично се присетувате на детективските филмови од тоа време, Rough Justice: ’84 е одличен наслов за негување на таа носталгија.
Причината поради која одново ја споменуваме Rough Justice: ’84 е гивавејот кој го организираме за еден од нашите читатели. Доколку сметате дека ова е игра во која би можеле да уживате, испратете мејл на [email protected], со каква било содржина. До крајот на неделата, ќе испратиме Steam код на еден среќен читател! Среќно!
Повеќе детали за играта
- Произведува: Gamma Minus UG
- Издава: Daedalic Entertainment
- Жанр: симулација, истрага
- Платформа: Microsoft Windows
- Излезена на: 13 март 2023
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
