Salesforce ја прекинува досегашната развојна насока на својата PaaS платформа Heroku, наменета за развој, распоредување и скалирање на апликации. Наместо понатамошно воведување нови функционалности, платформата ќе премине на т.н. „модел на поддршка“, со фокус на стабилност, безбедност и одржување.
За постојните корисници кои плаќаат со кредитни картички нема да има промени. Сепак, нови корпоративни договори повеќе нема да бидат достапни, што значи дека Heroku постепено се повлекува од enterprise сегментот.
Од Salesforce велат дека инвестициите ќе бидат пренасочени кон развој на корпоративни AI решенија, кои стануваат стратешки приоритет на компанијата.
„Heroku останува активно поддржана и подготвена за користење платформа, со фокус на квалитет и оперативна сигурност, наместо воведување нови функции. Клучните можности како апликации, pipelines, тимови и add-ons – остануваат непроменети, а клиентите можат да продолжат да ја користат платформата за своите бизнис-критични системи.“
Кратка историја на Heroku
Heroku беше основана во 2007 година од тројца Ruby програмери: Џејмс Линденбаум, Адам Вигинс и Орион Хенри. Платформата стекна популарност благодарение на едноставното деплојување директно од GitHub master гранката, што ја направи омилена кај стартапи и независни развивачи.
Во 2012 година Salesforce ја купи компанијата за 212 милиони долари. По укинувањето на бесплатниот тарифен план во 2022 година, интересот и користењето почнаа значително да опаѓаат.
Што значи ова за корисниците?
Иако Heroku нема целосно да згасне, јасно е дека платформата влегува во фаза на одржување наместо активен развој. За нови проекти и компании кои бараат долгорочни иновации, можеби ќе биде потребно да разгледаат алтернативни PaaS решенија.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
