По одреден период во ран пристап, за што нашироко пишувавме и тука, акционата roguelike игра Jotunnslayer: Hordes of Hel конечно ја достигна својата целосна верзија 1.0. Инспирирана од нордиската митологија, чедото на Games Farm, ARTillery ве става во улога на проколнати херои кои мора да се соочат со бескрајни орди на митолошки суштества за да го заслужат своето место меѓу боговите. Со официјалното издание, играта не само што го комплетира своето основно искуство, туку и воведува значајни новини кои го продлабочуваат светот и ги зголемуваат предизвиците, со посебен фокус на новиот регион Helheim.
Како игра која припаѓа на horde-survivor жанрот, Jotunnslayer: Hordes of Hel е едноставна, но крајно забавна игра каде што целта е да се преживее што е можно подолго против постојано растечки бранови на непријатели.
Вие избирате еден од неколкуте достапни херои, секој со уникатни почетни способности и оружја, па потоа се фрлате во временско-ограничени битки. Со секој поразен непријател, се собираат ресурси кои овозможуваат стекнување на божествени благослови – привремени надградби кои траат до крајот на рундата. Овие надградби овозможуваат креирање на различни комбинации на вештини, што е клучно за успехот.
Покрај тоа, играта вклучува и систем за мета-прогресија, каде што трајните надградби, отклучувањето на нови ликови и бонуси обезбедуваат чувство на напредок дури и по неуспешните обиди, охрабрувајќи ве да се вратоте посилни во следната битка.
Со доаѓањето на верзијата 1.0, најголемата новина е воведувањето на целосно нов свет – Helheim. Ова мрачно и застрашувачко подземје, според митологијата, е царство на мртвите, а во играта е претставено како регион со линеарна патека и загатки, што претставува освежувачка промена од отворените арени во другите светови.
За да се пробиете низ овој свет, можете да го изберете новиот херој, Kinslayer – паднат воин кој специјализира за нанесување огромна штета. За оние кои ќе успеат да ги надминат сите предизвици на Helheim, се отклучува Endless Mode, кој нуди врвен тест на вештините и издржливоста против незапирливи орди.
Како дополнителна помош во битките, воведен е и нов божествен сојузник, змејот Nidhogg, кој може да биде повикан да ги уништи непријателите на бојното поле.
Од аудиовизуелна гледна точка, Jotunnslayer: Hordes of Hel се стреми да понуди мрачна и атмосферска презентација која одговара на нордиската тематика. Графичкиот стил е детален, со дизајни на непријатели инспирирани од митолошки суштества, додека ефектите од способностите се дизајнирани да бидат визуелно впечатливи за да се задржи прегледноста среде хаосот на екранот.
Звучната подлога дополнително го засилува искуството, со епска музика која ја нагласува тензијата на битките и квалитетни звучни ефекти кои даваат тежина на секој удар и магија. Овие елементи заедно создаваат кохезивно и потопувачко искуство кое гве вовлекува во суровиот свет на викиншките легенди.
На крајот, Jotunnslayer: Hordes of Hel претставува одличен избор за љубителите на акциони roguelike игри и конкретно на жанрот за преживување орди. Неговата сила лежи во комбинацијата на брза и динамична борба со длабок систем за стратешко градење на ликови преку различните божествени благослови.
Нордиската митологија не е само површна тема, туку е интегрирана во механиките, ликовите и световите, давајќи ѝ на играта силен идентитет. Верзијата 1.0 успешно го заокружува пакетот со додавање на значајна содржина која нуди нов предизвик дури и за ветераните од раниот пристап. Со воведувањето на Helheim и бескрајниот режим, играта сега нуди комплетно и полирано искуство кое гарантира десетици часови на адреналинска забава и постојано враќање на пеколните бојни полиња.
Повеќе детали за играта
- Произведува: Games Farm, ARTillery
- Издава: Grindstone
- Жанр: акција
- Платформа: Microsoft Windows
- Излезе на: 21 јануари 2025
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
