Hirogami е нов уникатен наслов кој произлегува од добро познатото студио Bandai Namco Studios Singapore. Оваа 3D акциона платформа е инспирирана од древната јапонска уметност на виткање хартија – оригами. Со максимално користење на оваа уметност, играта ве носи во еден визуелно впечатлив свет изработен целосно од хартија и полн со впечатливи предизвици.
Тешка леснотија
Во Hirogami, ја преземате улогата на Хиро, мајстор на уметноста на „виткање“ (хартија) и заштитник на својот кревок дом од инвазијата на смртоносни дигитални суштества познати како the Blight. Приказната се одвива во мирното село Шишики, чиј деликатен баланс е нарушен, а Хиро е единствениот кој може да ја врати хармонијата во земјата. Преку мистично патување исполнето со истражување, решавање загатки и динамична борба, секој елемент е дизајниран да ја пренесе физичката, но и кревка природа на светот од хартија.
Механиките на играње во Hirogami се длабоко поврзани со централната тема на трансформација. Основната способност на Хиро е да се претвора во различни оригами животни, при што секоја форма нуди специфични вештини неопходни за навигација и борба. На пример, трансформацијата во Armadillo му овозможува да се тркала низ пречки и да пробива низ групи непријатели, додека мајмунската форма му дава сила да се искачува по високи структури и моќно да ги удира противниците. За достигнување на претходно недостапни височини, ќе ја користите формата на жаба, која има способност за неверојатно високи скокови и исфрлање отров.
Покрај овие животински форми, Хиро може да се претвори и во обичен лист хартија за да лебди на топли воздушни струи или да се провлече низ тесни процепи, како и да се „спакува“ во хартиено авионче за да прелетува големи провалии. Борбениот систем се потпира на користење на хартиената лепеза на Хиро за одбивање на дигиталните непријатели, но и на уникатните напади на секоја животинска форма, создавајќи флуиден и стратешки пристап кон секој судир.
Графичкиот стил во Hirogami е целосно посветен на естетиката на оригами, каде што секој лик, објект и дел од околината изгледа како да е прецизно изработен од свиткана хартија. Овој уметнички пристап создава чувство на рачно изработен и нежен свет, што го прави контрастот со дигиталната чума уште повпечатлив. Непријателите се дизајнирани да изгледаат како да имаат дигитални гличеви, остри линии и неприродни текстури кои го нарушуваат органскиот изглед на оригами светот. Оваа визуелна дихотомија не е само естетски избор, туку и наративен елемент кој ја засилува приказната за судирот помеѓу природата и вештачката технологија.
Звучната подлога дополнително ја збогатува атмосферата, користејќи композиции изведени на традиционални јапонски инструменти. Музиката вешто се прилагодува на ситуацијата – од мирни и медитативни мелодии при истражување, до напнати и ритмични композиции за време на борбите. Звучните ефекти, како што се шумолењето на хартијата при движење и трансформација, совршено го надополнуваат визуелниот стил и придонесуваат за целосно потопување во овој уникатен свет.
Со својот уникатен концепт, визуелна извонредност и инвентивни механики, Hirogami се издвојува како наслов кој ветува повеќе од обична забава. Го препорачуваме овој наслов на сите што бараат длабоко и уметничко искуство, како и на љубителите на платформери кои се желни за иновации. Способноста на играта да ја спои смирувачката естетика на оригами со динамична акција создава ретко и незаборавно искуство. Низ релативно долгата игра ќе наидете на прекрасни и ретко видени места кои се полни со предизвикувачки непријатели, предизвикувачки загатки, но и интересни можности за платформско движење и истражување.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
