По шест години функционирање и продавање DRM-Free ретро дигитални игри, француската продавница, DotEmu реши дека нема да продолжи понатаму и дека е време да се згаснат продажните услуги. Сите досегашни купувачи имаат рок до 1 јуни да ги преземат игрите од нивниот дигитален фронт.
„По повеќе од 6 години добра и лојална услуга, жал ни е да ве информираме дека решивме целосно да ја затвориме онлајн продавницата на DotEmu. Таа беше место каде илјадници PC гејмери беа во можност да ги најдат и купат нивните омилени ретро игри, но повеќе немаме избор и принудени сме да ја затвориме продавницата “, пишува компанијата.
Одлуката морала да се донесе затоа што сѐ повеќе и повеќе компании продаваат игри на онлајн пазарот и конкуренцијата, што според нив, е позастрашувачка од кога било.
„Од друга страна, веќе неколку години се фокусираме на развивање и издавање игри за конзоли и мобилни игри наместо дистрибуција“.
Ова, смета компанијата, е главната причина поради која решиле да ја згаснат продавницата.
DotEmu беше една од ретките продавници која, како и GOG, ги продаваше нивните игри без било какви заштити и дозволува целосна слобода во начинот на кој сакате да ги инсталирате и играте купените наслови. Продавницата повеќе не продава игри, но сите претходно купени можете слободно да си ги преземете до 1 јуни и да си направите нивен бекап.
За крај, од компанијата ветија дека и понатаму ќе бараат одлични ретро игри за нивната заедница затоа што нивната мисија и понатаму останува иста, а тоа е да им овозможат на сите гејмери, хитовите од вчера да се појават на платформите од денеска, не исклучувајќи ги PC, мобилните направи, како и конзолите.
„Ви благодариме уште еднаш што бевте дел од авантурата на DotEmu и за сета поддршка што нѝ ја пруживте. Низ годините, растот на DotEmu немаше да биде можен без вербата која ја вложивте во нашата компанија“.
