„PC Game Pass предлози“ е серијал посветена на откривање на најдобрите игри достапни преку претплатничкиот сервис на Microsoft. Со копање широко и длабоко низ богатата библиотека на PC Game Pass имаме за цел да ви ги претставиме најинтересните, најзабавните игри што вреди да ги одиграте.
Што е Game Pass?
Game Pass е револуционерен претплатнички сервис од Microsoft, често опишуван како „Netflix за видеоигри“. За фиксна месечна претплата, добивате неограничен пристап до стотици висококвалитетни игри – од најновите блокбастери на Xbox Game Studios до инди-бисери и класични наслови. Претплатата е достапна за конзолите Xbox и за компјутер (PC Game Pass), овозможувајќи ви слободно да ги преземате и играте игрите сѐ додека вашата претплата е активна. По истекот на претплатата, пристапот до игрите се прекинува сѐ додека не ја обновите.
DEEP ROCK GALACTIC: SURVIVOR – Преживување во длабочините на Хоксес
DEEP ROCK GALACTIC: SURVIVOR е забавен наслов кој го пренесува познатиот универзум поврзан со ко-оп соработка и рударство во искуство фокусирано на еден играч. Играта го трансформира познатиот свет на Deep Rock Galactic во survivor-like auto-shooter, дозволувајќи ви да одите се подлабоко и подлабоко и да се соочувате со бескрајните орди на вонземјани на опасната планета Хоксес.
Како и сите слични игри, така и овде имате автоматско пукање и целосен фокус на стратешко движење, избегнување на непријателите и ефикасно рударење. Циклусот на игра е брз и интензивен, при што уништувате бранови на суштества, ги пробивате ѕидовите на пештерите за да соберете вредни минерали и потоа ги користите ресурсите за да отклучите моќни надградби за вашето оружје и опрема. Секоја мисија се одвива во процедурално генерирани пештери кои кријат различни непријатели и ресурси.
Визуелно, играта го задржува карактеристичниот уметнички стил на оригиналниот наслов, со стилизирани модели и мрачна, клаустрофобична атмосфера која верно го доловува чувството на изолација под земја. Звучниот дизајн е извонреден и придонесува за целокупното искуство; од задоволувачките звуци на кршење карпи и моќните ефекти на оружјата, па се до специфичните крици на различните суштества.
DEEP ROCK GALACTIC: SURVIVOR успешно ја дестилира суштината на оригиналната игра во еден компактен и исклучително зависен формат. Како резултат, добивате чисто, адреналинско искуство кое е идеално како за ветераните на франшизата, така и за новите играчи кои бараат квалитетен и предизвикувачки survivor-like наслов.
SWORN: Roguelike авантура во Камелот
За сите детали поврзани со прекрасната, но предизвикувачка игра на Windwalk Games и Team17, топло препорачуваме да го прочитате текстот на следниот линк. Се работи за „возбудлива rogue-like игра која нуди длабоко кооперативно искуство, богата приказна вкоренета во легенди, и огромна репетитивност преку својот систем на благослови и билдови. Со својот уникатен уметнички стил и предизвикувачки гејмплеј, играта има потенцијал да ги освои како љубителите на Артуровите митови, така и оние кои бараат интензивна акција и стратешка длабочина.
Visions of Mana: Враќање кон корените со модерен сјај
Во Visions of Mana, приказната ги следи Вал и неговата пријателка од детството, Хина. Нивното патување ги води низ свет исполнет со духови и мистерии, каде што се соочуваат со прашањето за судбината и предодреденоста.
Во Visions of Mana, ќе имате за задача да се фокусирате на истражување на пространи, полуотворени предели исполнети со шармантни, но опасни суштества. Борбениот систем е издигнат на повисоко ниво, нудејќи динамични тридимензионални битки кои бараат брзи рефлекси и стратегија. Притоа, можете да ја користат моќта на елементалите, вградена во вашите оружја, што овозможува инстантно менување на различни класи и стилови на борба. За навигација низ огромниот свет, воведени се нови придружници наречени „пикули“. Благодарение на нив, можете брзо и безбедно да патувате низ разноликите терени.
Визуелниот идентитет на играта е верен на препознатливиот стил на серијалот, со живописна палета на бои и свет кој изгледа жив и исполнет со енергијата на духовите. Графичкиот дизајн успешно го пренесува чувството на магија и авантура. Аудио доживувањето е подеднакво импресивно, со приближно 100 музички нумери создадени од композитори ветерани на франшизата. Посебно се истакнува интерактивната музика во теренските области, која динамично се менува и го засилува чувството на истражување и откривање.
Благодарение на системот на елементали и класи, Visions of Mana нуди длабоко и стратешко борбено искуство, правејќи ја играта привлечна и за ветераните и за новите играчи. Полуотворениот свет е полн со интересни работи за истражување, а динамичната борба внесува свежина во акциониот RPG жанр. Во случај да сте фанови на серијалот, ќе наидете на промислена еволуција на франшизата, нудејќи авантура која е истовремено и позната и иновативна.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
