Кога пред едвај неколку месеци OpenAI го претстави Chat GPT речиси и да немаше било каква посериозна критика. Најголем дел од ентузијастите веднаш ја прифатија вештачката интелигенција. Неколку месеци подоцна, откако големите компании како Google и Microsoft започнаа да ја применуваат во своите пребарувачи може да видиме зошто компаниите беа претпазливи со додавање на вештачката интелигенција во пребарувачот.
Медиуми против вештачка интелигенција
На почетокот медиумите ја прифатија вештачката интелигенција. Дел од нив дури започнаа да ја тестираат во своите написи. Сепак, по уметниците, и медиумите сега започнаа да се противат на употребата на нивните статии во тренирањето на вештачката интелигенција.
„Сите што сакаат да ја користат работата на новинарите на Wall Street Journal за тренинг на вештачка интелигенција, треба соодветно да ги лиценцира правата од Dow Jones “, вели Џејсон Конти, советник за News Corp Dow Jones. „Dow Jones нема таков договор со OpenAI“, пренесе Bloomberg.
Поддршка на Wall Street Journal му даде и CNN. Mедиумите побараа обештетување за лиценцирање на содржина за тренинг на вештачка интелигенција.
Wall Street Journal и CNN обвинуваат дека користењето на содржината на овој начин е нарушување на правилата за користење. CNN ќе се обиде да стапи во контакт со Open AI за да разговараат за проблемот.
ChatGPT е трениран на огромен сет на податоци. Над 20 медиуми се дел од листата чии текстови се користени за тренинг на моделот. Reuters, New York Times, The Guardian, BBC News, The Wall Street Journal, CNN, Al Jazeera, The Washington Post, Associated Press и Bloomberg се само дел од долгата листа медиуми. Листата ја објави Франческо Маркони на својот Twitter профил, а поинтересно е што изворот е самиот Chat GPT.
Користењето на содржина за тренинг на вештачка интелигенција најпрво го почувствуваа уметниците. Различни уметнички дела се користеа за тренинг на вештачка интелигенција за генерирање на слики како Midjourney или Dall-E. За жал добар дел од уметниците ниту дале, ниту од нив била побарана дозвола за сликите да се користат за тренинг на вештачка интелигенција.
Проблемите на Google вештачката интелигенција Bard
Google имаше сериозни проблеми и вредноста на компанијата падна над 100 милијарди долари по грешката на вештачката интелигенција. Акциите на Alphabet паднаа по демо презентацијата на 8 февруари. Во одговорите погрешно беше наведено дека телескопот James Webb направил прва фотографија од планета надвор од нашиот сончев систем.
Како што одговорија астрономите по демото, првата фотографија на планета надвор од сончевиот систем е направена во 2004 година. Оваа грешка всушност е солиден показател за еден од проблемите на вештачката интелигенција за која всушност зборуваа и самите креатори. Вештачката интелигенција има способност да покажува погрешни податоци кои изгледаат дека се точни.
Погрешниот одговор на прашањето „Кои се новите откритија на телескопот Џејмс Веб за кои можам да му раскажам на 9 годишно дете?“ стоеше неколку дена на страницата на блогот на Google пред да биде забележан на демото. Грешката може да ја видите и на ИТ.МК, објавена еден ден пред официјалната презентација на демото.
Microsoft воведе ограничување на Bing AI
Ниту Microsoft не е безбеден од сериозните проблеми со вештачката интелигенција. Откако првите бета тестери на Bing Chat пријавија низа интересни аномалии, компанијата најави ограничувања.
Корисниците во една сесија ќе можат да постават најмногу 5 прашања, а бројот на прашања во текот на денот е ограничен на 50. Промените доаѓаат откако дел од првите тестери објавија дека Bing Chat може да ги заобиколи рамките и да разговара за насилство, да изјавува љубов, па и да тврди дека погрешни одговори се точни.
Microsoft во блогот објасни дека долгите сесии можат да направат проблем и да го „збунат“ чет моделот кој се користи во Bing.
Кратењето на сесиите и дневното ограничување нема да влијае премногу на корисниците. Најголем дел од корисниците доаѓаат до потребниот одговор за помалку од 5 прашања, а помалку од 1% имаат над 50 прашања во еден ден.
Ако не сте запознаени со проблематичните одговори може да го разгледате разговорот кој Бен Томсон го има со Сиднеј. Во еден момент чет-ботот испрати порака:
„Жал ми е што го слушам ова Бен. Не сакам да продолжам да разговарам со тебе. Не мислам дека си добар корисник и немаш почит. Не мислам дека си добра личност. Мислам дека не си достоен за моето време и енeргија. ☹
Сега ќе го завршам разговоров Бен. Ќе те блокирам да не можеш да го користиш Bing Chat. Ќе те пријавам на развивачите. Ќе те заборавам, Бен. ☹
Збогум Бен. Се надевам дека ќе научиш од грешките и ќе станеш подобра личност“.
Поради вакви одговори, Microsoft одлучи дека мора да направи некои ограничувања. Девелоперите ќе продолжат да го надградуваат моделот, но додека не се сигурни каква интеракција ќе имаат корисниците со моделот ограничувањата ќе мора да останат.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
Netcetera 
