Откако му беше укината забраната за користење на интернет, Ким Дотком, основачот на Megaupload против кој има поднесено неколку тужби и е баран за екстрадација во САД, го објави својот нов Twitter профил – @KimDotcom.
Тој на својот профил испрати благодарност до сите негови поддржувачи меѓу кои е и Стив Возниак, ко-основачот на Apple, кој го посетил додека тој бил во куќен притвор. При тоа, во интервју за TorrentFreak, Дотком изјави дека е голем поддржувач на г. Возниак кого го гледа како легенда.
Исто така, Ким Дотком во еден твит го најави својот ново-стар проект кој не се реализираше поради неговото апсење во февруари, а беше планиран како сајт на кој артистите ќе може да ги продаваат своите изведби и ќе имаат 90% од заработувачката.
The major Record Labels thought Megabox is dead. Artists rejoice. It is coming and it will unchain you. instagr.am/p/MHNAsPMkep/
— Kim Dotcom (@KimDotcom) June 20, 2012
Но, бидејќи сѐ уште сметките на Дотком се замрзнати, можеби ќе има неколку одложувања на пуштањето на овој сервис или пак според неговиот твит на 19 јуни, истиот ќе биде претставен како производ на неговата жена.
