Веќе пишувавме дека Европската унија ќе ја објави целосната листа на компании означени како „gatekeeper“ оваа недела. Комисијата ја објави и официјалната листа на која се најдоа Alphabet, Amazon, Apple, ByteDance, Meta, Microsoft. Единствено изненадување е неприсуството на Samsung кој во дел од листите беше неофицијално објавуван како шеста компанија „gatekeeper“.
Она што сега е познато, а досега само го нагаѓавме е за кои сервиси, апликации, услуги, платформи компаниите ќе бидат построго надгледувани.
Така Alphabet е на листата за Google Maps, Google Play, Google Shopping, рекламите, Chrome, Android, YouTube и Google Search. Amazon е на листата за Amazon Marketplace и рекламите. На листата на Apple се App Store, Safari и iOS. ByteDance е на листата за TikTok. Meta за Facebook, Instagram, Meta Marketplace, рекламите, Whatsapp, Messenger. Microsoft за LinkedIn и Windows PC OS.
За Microsoft и за Apple листата би можела наскоро и да се прошири. Microsoft би можел да биде „gatekeeper“ и со Bing, рекламите и Edge, а Apple со iMessage. Комисијата го разгледува и iPad OS, но овој оперативен систем нема доволно корисници. Сепак, покрај недоволниот број корисници iPad OS може да се најде на листата ако комисијата процени дека има преголема доминација на пазарот. Конечната одлука за овие продукти ќе дојде најдоцна за 5 месеци.
Gmail, Outlook.com и Samsung Internet Browser не се најдоа на листата. Аргументите на Alphabet, Microsoft и Samsung беа доволни за да ја убедат комисијата дека немаат голема предност пред конкурентите со своите платформи. Ова беше причината поради која Samsung воопшто не се најде во листата „gatekeepers“.
Изгледот на кор платформите според категории
Условите што треба да ги исполнат „gatekeeper“-компаниите зависат од категориите во кој некој сервис се наоѓа. Eве како изгледа овој распоред по категории:
Друштвени мрежи: TikTok, Facebook, Instagram, LinkedIn
N-IICS (услуги за пораки): WhatsApp, Messenger
Посредување: Google Maps, Google Play, Google Shopping, Amazon Marketplace, Apple App Store, Meta Marketplace
Споделување видео: YouTube
Рекламни услуги: Google, Amazon, Meta
Веб-прелистувачи: Chrome, Safari
Пребарување: Пребарување на Google
Оперативни системи: Android, iOS, Windows
За компанијата да биде одбележан Gatekeeper треба да има обрт од 7,5 милијарди евра годишно, вредност од 75 милијарди евра и барем 45 милиони месечно активни корисници во Европа.
Секоја категорија има различни услови ако е прогласена за клучен сервис. Така пребарувачите мора да обезбедат избор од други пребарувања, оперативните системи мора да овозможат деинсталирање на апликации со кој доаѓа оперативниот систем. Продавниците нема да можат да ги преферираат своите производи пред конкуренцијата и слично. За оперативни системи забрана за задолжително користење на сервиси од компаниите, на пример системи за плаќање во продавниците за апликации. Целата листа со ЧПП е достапна на страницата на Комисијата.
Што ќе се случува во иднина
Ова е прв дел од DMA распоредот. Комисијата овој месец отвора нови истраги на пазарот. Ако пронајде нови компании ќе бидат додадени во февруари.
Компаниите кои овој месец беа означени како „gatekeeper“ имаат време до март следната година да ги исполнат сите услови. За следната „тура“ на компании крајниот рок ќе биде во август.
Според распоредот компаниите имаат 6 месеци да ги исполнат своите обврски. По ова казните за прекршување се ригорозни. Максималната казна за прв прекршок е 10% од глобалните приходи. Во случај на повторно прекршување казната може да рипне на 20%. Систематските прекршувања може да бидат казнети со алтернативни мерки како барања за продажба на делови од компанијата или забрана за работа во Европа.
Очекувано ниту една од компаниите кои се најдоа на листата не се воодушевени.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
