Управата за јавни приходи (УЈП) во 2025 година ќе работи на развој и имплементација на новиот софтвер „Е-фактура“. Софтверот треба да овозможи подобар и сеопфатен надзор врз целокупниот промет на добра и услуги во Македонија. Оваа нова алатка, ќе помогне да се детектираат непријавени трансакции или фиктивни фактури. Со нејзина помош ќе биде полесно да се процени и кои компании го надминуваат дозволениот праг и стануваат ДДВ обврзници.
Новиот електронски систем ќе ги замени традиционалните процеси кои како по правило доаѓаат со куп хартија и физички документи. Со Е-фактурата ќе се олесни административниот товар и ќе се зголеми ефикасноста во следењето и наплатата на даночните приходи. Системот ќе ја олесни контролата на данокот на добивка и личниот доход. Тоа според најавата ќе придонесе за побрзо и поефикасно собирање на даночните приходи.
„Тоа е една главна алатка која што многу ќе го промени начинот на работење во УЈП и во поглед на собирање на даночните приходи, но секако во борбата со сивата економија и воопшто активностите и мерките на УЈП за мобилизација на даночните приходи, ќе влезат и многу други мерки“, вели директорката на УЈП, Елена Петрова во интервју за TV21.
Воведувањето на „Е-фактура“ ќе понуди значајни придобивки во повеќе аспекти. Новиот софтвер ќе овозможи подобрен и сеопфатен надзор врз даночните трансакции. Со ова значително ќе помогне во брзото откривање на непријавени трансакции и фиктивни фактури. Овој пристап ја зајакнува довербата меѓу фирмите и даночните органи, обезбедувајќи транспарентност во сите трансакции. Дополнително, отстранувањето на потребата од хартија, тонери и физички документи придонесува кон намалување на еколошкиот отпад. Ова секако е чекор кон поголема еколошка свест во деловната заедница, но и дополнително намалување на трошоците.
Промената кон електронско фактурирање значително ќе го поедностави работниот процес за фирмите. Трансформацијата на традиционалните и комплицирани системи за фактурирање кон дигитални решенија ќе ги ослободи компаниите од бројни административни обврски, овозможувајќи им да ги фокусираат своите ресурси на други критични аспекти од работењето. Претставниците на неколку ИТ-компании веќе ја препознаваат вредноста на е-фактурата како средство за намалување на даночната евазија и се подготвени активно да соработуваат со УЈП за да ги прилагодат своите софтверски решенија на реалните потреби на домашните фирми.
ИТ-компаниите ја препознаваат е-фактурата како алатка за намалување на даночната евазија
Како што се истакна во соопштението од УЈП, ИТ-компаниите ја препознаваат „Е-фактурата“ не само како алатка за намалување на даночната евазија туку и како средство за создавање додадена вредност за фирмите. Со воведувањето на овој електронски систем, ќе се елиминира потребата од хартија, тонери и физичко носење фактури на сметководителите, што значително ќе го поедностави административниот процес. ИТ секторот се подготвува активно да соработува со УЈП, да сподели искуства и да придонесе во тестирањето на новиот систем.
За даночниот систем воопшто, предизвиците не завршуваат тука. Во моментов, 5814 компании и граѓани имаат задолжувања кон УЈП. Како што укажува Елена Петрова, дел од проблемот се должниците кои се јавуваат со години наназад, иако правно се активни. Тука се поставува прашањето за нивната деловна активност.
Во финансиски аспект, резултатите за 2024 година се позитивен знак:
- 114,2 милијарди денари – вкупно собрани даноци за 2023 година,
- 120,1 милијарда денари – приход заклучно со ноември од оваа година, што значи зголемување од 5%. Се очекува дека со додавањето на декември, приходите да се зголемат уште повеќе.
Е-фактурата ги спојува модерните технолошки решенија со строги даночни мерки, претставува значаен чекор во борбата против сивата економија. Воведувањето на „Е-фактурата“ не само што ќе ги зајакне механизмите за контрола, туку и ќе ги олесни административните процеси како за фирмите, така и за даночните службеници, што во крајна линија придонесува кон економскиот развој и финансиската стабилност на Македонија. Со имплементацијата на „Е-фактурата“, Македонија ќе направи значаен исчекор кон модернизација и дигитализација на даночниот сектор. Новиот систем ќе овозможи полесна и поточна обработка на даночните информации, а со тоа и побрза наплата на даноци, што е клучно за економскиот развој на земјата.
Овој проект е дел од пошироката стратегија за мобилизација на даночните приходи и изградба на поефикасен даночен систем, кој ќе придонесе за стабилен и одржлив економски раст.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
