Судскиот налог кој властите го искористија да пребаруваат по домот на основачот на Megaupload, Ким Дотком, е нелегален, вели судија од Нов Зеланд. Според судијата, исто така е нелегално FBI да копира податоци и да ги пренесе во САД.
Судијата Хелен Винкелман вели дека во судскиот налог не било точно објаснето за какви прекршоци се работи.
FBI во рацијата ги заплени луксузните автомобили и компјутерите од неколку милиони вредниот дом на Ким Дотком, кој беше уапсен заедно со други четворица вработени во компанијата. Според судијата, налогот кој и бил даден на полицијата не опфаќал запленување и претрес, што значи дека активноста на полицијата е нелегална.
Ким Дотком моментално чека судење во август за екстрадикција во САД каде ќе му се суди за „мега заговор“ и проневера на стотици милиони долари преку злоупотреба на авторските права.
