Зошто да ја играте?
- Фанови сте на Metroidvania инспирирани игри
- Преубава пиксел арт графика и суптилни анимации
- Возбудлива приказна и предизвикувачко искуство
Верувале или не, првата Momodora игра, насловена како Reverie Under The Moonlight, излегува во 2016-та година. Студиото Bombservice ги импресионира гејмерите со бројни комби напади во еден ретро и Metroidvania инспириран свет. Со огромен акцент на истражување и битки, Momodora: Reverie Under The Moonlight лесно се сака, наоѓајќи се сеуште на врвот, со 93% позитивни рецензии на Steam. Пред една година, излезе долго-очекуваната Momodora: Moonlit Farewell, а пред еден месец – верзијата за конзолите. Како гејмери кои директно навлегуваат во овој серијал преку PS5 верзијата, едноставно моравме да се запрашаме: дали оваа игра е достојна надградба или неуспешен експеримент?
Одличен продолжеток!
Momodora: Moonlit Farewell се одвива пет години по настаните од „Momodora: Reverie Under the Moonlight“. Играјќи со Момо, ќе навлезете во мисијата да ги спасите нејзините луѓе од нешто што изгледа како неизбежно уништување. Како висока свештеничка на селото Кохо, Момо ќе биде принудена да го истражи мистериозното ѕвонење и да ја спречи инвазијата на демоните.
Иако не е задолжително, топло ви препорачуваме да поминете низ претходните игри пред да навлезете во Momodora: Moonlit Farewell
Најновата игра е замислена да го затвори наративниот круг од пред десет години и да понуди задоволителен крај за авантурите на харизматичните ликови, погрижувајќи се ниедно прашање кое ја разгоруваше имагинацијата на фановите да не остане неодговорено.
Како и да е, уште на самиот почеток ќе имате можност да се потсетите на големата снаодливост на Момо, нејзиното брзо движење, агилно избегнување противници, високо скокање или критични комбо напади. Лесно можете да се изгубите во навидум бескрајните зандани, но претпоставуваме дека токму и тоа е поентата во една Metroidvania игра.
Добрата работа е тоа што нам никогаш не би пречеше да „забегаме“ во спротивниот правец, само за да откриеме впечатливи локации, серија од предизвикувачки непријатели, или пак магични бобинки (кои ги зголемуваат нашите способности. Благодарение на ваквата отворена и непредвидлива природа на истражувањето, немојте да се изненадите кога целосно ќе заобиколите одредени босови.
Овие супериорни противници се креативно осмислени и нудат забавен предизвик, каде е потребно да ги учите нивните шеми и соодветно да се прилагодувате (преку здрава доза умирање, подразбирливо). Дополнителен предизвик доаѓа во форма на арени каде константно сте напаѓани од бранови од непријатели. Овие работи не се случуваат премногу често, но, секојпат кога ќе се случат – успеваат да воведат пријатна свежина.
Момо се одликува со два едноставни напади – меч и лак и стрела.
Умирањето е лесно во Momodora: Moonlit Farewell, барајќи од вас да будност и правилно користење на механиките, како првремена неранливост доколку во последен момент избегнете удар. Тоа што се бараат брзи рефлекси од вас никако не значи дека играта е нефер. Напротив, девелоперот се има погрижено да не ве опсипува со премногу работи, туку внимателно го зголемува предизвикот, давајќи ви доволно време да станете подобри. За поголема флексибилност поврзана со стилот на играње, низ бројните локации ќе наоѓате и сигили, односно карти кои отклучуваат нови борбени способности или пак имаат улога на трајни статистички засилувачи.
На крајот на денот, Momodora: Moonlit Farewell е како прекрасно проштално писмо низ чии редови се споменуваат сите прекрасни моменти од минатото. Со препознатливата графика, динамичната музичка подлога и предизвикувачките гејмплеј механики, играта е топла препорака и за фановите и за оние кои по првпат навлегуваат во овој серијал.
Повеќе детали за играта
- Произведува: Bombservice
- Издава: PLAYISM
- Жанр: Metroidvania, авантура
- Платформа: Microsoft Windows, конзоли
- Излезена на: 11 јануари 2024
Оценка
- Вкупна оценка: 9.5
- Приказна: 10
- Гејмплеј: 9
- Графика: 9
- Звук и музика: 10
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
