Што е Shadow Warrior 2?
FPS игра и директен наследник на хитот од 2013-та година. Играте со Ло Венг, нинџа воин со име кое зборува за катастрофално детство и сегашност преполна со армии од демони. Акцент е на брза и бесмислена акција каде касапите сѐ живо и диво со над 70 различни и надградливи оружја. Играта се одликува со нов ко-оп режим на играње до четири играчи, собирање плен, како и посебна област од која започнувате мисии и надградувате способности. Секоја мисија, освен оние поврзани за приказната, се генерирани по случаен избор, од желба да се зголеми вредноста за преигрување.
Кои се Flying Wild Hog?
Независно полско студио основано во 2009 година од Tomek Baran, Michał Szustak и Klaudiusz Zych. Студиото брои околу сто вработени, а повеќето од нивните резимеа можат да се пофалат со работа на наслови како Bulletstorm, Sniper и The Witcher 2. Авторите имаат изградено нивен Road Hog Engine, кој е со нив уште од пионирската Hard Reset.
Што вели светот за Shadow Warrior 2?
Со Metascore оценка од 79, Shadow Warrior 2 дефинитивно се издига над просекот, а во таквото нешто значително помага рецензијата на Telegraph која дава за играта 100 поени и објаснува дека се работи за фантастичен пример за тоа како се комбинира желбата за собирање плен со FPS игра од врвна класа. IGN и даваат оценка од 86 и го фалат хуморот, како и бројните убиствени можности на бројните ладни и огнени оружја. „Достоен наследник на хитот од 2013 година“, објаснуваат од Attack of the Fanboy (80) и додаваат дека е повеќе од очигледна посветата на гејмплеј системот и дека тоа никако не влијае на шармот од оригиналот. Gamer.nl и дава оценка од 75 и иако признаваат дека Shadow Warrior 2 е добра игра, никако не е одлична и дека таквото нешто највеќе се должи на слабата приказна како и новите елементи кои нудат свежо искуство, но го оттргнуваат играчот од акцијата.
Со оценка од 70, PC World се разочарани од слабата приказна и бесцелните нивоа и сметаат дека подобрувањата во борбениот и графичкиот систем не можат доволно да надоместат. Trusted Reviews даваат иста оценка и признаваат дека SW2 треба да се ужива во мали дози затоа што играта не располага со доволно длабок и разновиден систем за подолга или повпечатлива посвета. GameSpew даваат иста оценка, но се исклучително задоволни од можноста да се префрлате од еден на друг непријател и да ги комадате на парчиња. Polygon и дава најниска оценка од 50 и објаснува дека оние кои бараат игра со масакрирање демони би можеле да поминат и полошо, но „сѐ останато делува празно. Ликовите се безживотни, шегите не се смешни, приказната е бескорисна, а мапите се здодевни.“
Што велиме ние?
Shadow Warrior 2 е за сите оние кои бараат брз и задоволителен гејминг фикс и таквото нешто, дали преку приказната или откаченото насилство, е повеќе од очигледно. Како со првата, така и со втората игра, Flying Wild Hog имаа за цел да понудат графички-исполнително, крајно откачено искуство кое не се ни труди, нити пак сака да биде сфатено сериозно. Со ставање на приказната во втор план, Shadow Warrior 2 само се поставува како одлично решение за инстантно задоволување на вашата примарна и животинска потреба за насилство. А таквото нешто, ќе се сложите, воопшто не мора да има смисла.
Што велите вие?
Кажете ни во коментарите, на друштвените мрежи или во гејминг секцијата на ИТ форум!
- Развивач: Flying Wild Hog
- Издавач: Devolver Digital
- Режисер: Мајкл Зустак
- Дизајнер: Павел Ковалевски, Микал Музур
- Програмери: Крзистоф Нарковиц, Куба Опон
- Уметници: Павел Либизевски, Луказ Здуновски
- Писател: Скот Александар
- Композитор: Микал Чиелечки, Крзистоф Виерзункиевиц
- Серијал: Shadow Warrior
- Енџин: Road Hog Engine
- Платформи: Microsoft Windows, PlayStation 4, Xbox One
- Излезена на: 13 октомври 2016
- Жанр: Акција во прво лице (First-person shooter)
- Режими на игра: едно или повеќе лица
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
