Стравот од неможноста за играње на Call of Duty на PlayStation 5 ја натера Федералната комисија за трговија да размисли да го сопре купувањето на Microsoft на Activision Blizzard.
Двете компании се договорија во јануари минатата година за сума од 68,7 милијарди долари. Договорот требаше да помине низ регулаторите кои требаше да оценат дали постои опасност од создавање на монопол. Вообичаено овој чекор е формалност и лесно поминува, но овој пат не е така. Американската Федерална агенција за трговија ќе започне спор со креаторот на Xbox и Windows со цел да го спречи купувањето на Activision Blizzard.
Доколку Microsoft го добие спорот и купопродажбата заврши, компанијата наеднаш ќе стане трет најголем издавач на видеоигри во светот, зад Tencent и Sony. Креаторот на Xbox веќе поседува неколку студија. Дел од Microsoft се и креаторите на серијалот Elder Scrolls, Fallout, Doom и Quake – ZeniMax media. Токму однесувањето на Microsoft откако го купи Zenimax е една од причините поради кои агенцијата ќе го блокира купувањето.
Microsoft по купувањето на Zenimax одлучи популарните видеоигри од овој издавач Starfield и Redfall да бидат ексклузивни за Microsoft. Ова значи дека игрите кога ќе излезат ќе бидат достапни единствено на конзолите на компанијата, но и на Windows PC. Сопствениците на конзолите на Sony и Nintendo за жал нема да можат да ги играат овие игри. Или барем ќе постои одреден период на ексклузивност.
„Microsoft веќе покажа дека ќе се обиде да ги блокира содржините од гејминг конкурентите. Сакаме да го спречиме Microsoft да стекне контрола над водечкото независно студио за видеоигри, и да го користи за да и наштети на конкуренцијата во повеќе динамични и брзорастечки гејминг пазари“, вели Холи Ведова, директорка на Бирото за конкуренција на FTC.
Сепак во Activision се оптимисти дека ќе успеат да ја затворат зделката:
„Тврдењето дека договорот е антиконкурентен не е во согласност со фактите. Веруваме дека ќе победиме во овој спор“, вели директорот на Activision Боби Котик.
Ќе биде интересно да видиме дали Microsoft и Activision ќе успеат да ги убедат регулаторите дека нема опасност од монопол. Креаторот на Windows оваа недела потпиша договор со Nintendo. Со договорот се обврза дека во следните 10 години Call of Duty ќе биде достапна на нивните конзоли. Компанијата понуди ист договор да потпише и со Sony, но засега нема одговор. Дали ова ќе биде доволно и за Федералната комисија ќе дознаеме наскоро.
Microsoft Gaming
Ова е четврти пат последниве неколку години Microsoft значително да го прошири своето гејминг портфолио. Досега ги додаде Mojang (Minecraft); Obsidian Entertainment (Fallout: New Vegas, Alpha Protocol, Pillars of Eternity 1 и 2); Ninja Theory (Hellblade, DmC); Playground Games (Forza Horizon); Undead Labs (State of Decay); Compulsion Games (Contrast, We Happy Few). Пред Activision Blizzard, Microsoft „потроши“ 7,5 милијарди долари на ZeniMax Media, издавачот на The Elder Scrolls, Fallout, Doom, Quake, и Dishonored.Доколку успее да го заврши договорот на листата игри ќе бидат додадени и Call of Duty, Warcraft, World of Warcraft, StarCraft, Diablo, Overwatch, Guitar Hero, Tony Hawk’s, но и мобилниот хит Candy Crush.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
