Елвис Чилдера има само 19 години, а веќе има надминато повеќе предизвици од многу повозрасни луѓе. Всушност целото негово образование за девелопмент е огромен предизвик.
Тој учел да програмира на Nokia 2690 телефон, кој го добил од свој роднина. Телефонот не бил многу напреден, но бил доволен да научи да програмира, вели, г. Чилдера, во блог на CNN. Сè што научил е од W3School, а успеал на телефонот и да програмира.
„Штом станав вешт програмер, првата идеја која ја добив беше од филмот The Social Network, кој е за основањето на Facebook.
Бев инспириран од Марк Закербер. Но, сакав да одам понатаму и да креирам нешто подобро. Во овој период на Facebook можеше да се поврзете со луѓето кои ги познавате, а јас сакав да креирам платформа која може да ги поврзе сите“.
Откако не успеал да креира друштвена мрежа која ќе го замени Facebook, се префрлил на нова идеја, па на уште една. Сакал да научи Java за да може да креира апликација, но и за ова му бил потребен компјутер, а тој не можел да си го дозволи. Со помош на Ј2МЕ SDK Mobile, успеал да го користи истиот Nokia телефон за да програмира во Java.
Неговата прва апликација која овозможувала испраќање поевтини тест пораки во Нигерија, поминала одлично. Имала над 5.000 корисници и тогаш бил забележан од медиумите. Г. Чилдера тогаш имал само 14 години.
Кога завршил средно училиште, конечно успеал да собере доволно пари и да купи лаптоп. А, тука Android му овозможил многу повеќе.
Конечно можел да реализира посериозна идеја. Креирање на пристап до видео едукација која ќе биде доволно „лесна“ за да биде достапна насекаде. Идејата на која сега работи е креирање на платформа за едукација која ќе овозможи најмногу 1 MB сообраќај за секој 1 час видео. Ова ќе овозможи платформата да може да се користи и да се популаризира во Африка.
Платформата dot Learn е стартап поддржан од универзитетот MIT. Технологијата беше презентирана на неколку натпревари: Techcrunch Battlefield Africa, Cisco Innovation Challenge и MIT Inclusive Innovation Challenge.
