По одлични четири епизоди, нашиот омилен платен убиец се враќа во петта епизода, насловена како Freedom Fighters. Со претпоследната епизода од оваа сезона, Hitman доаѓа во Америка, поточно во Колорадо, а, според издавачот Square Enix таквото нешто воопшто нема да е лесно.
„Ова е една од најтешките епизоди“, вели претставник од IO Interactive, студиото задолжено за играта. „Не само што имате четири мети за елиминирање туку и сте на непријателски терен од самото стапнување во Колорадо“. Според претставникот, мисијата има за цел да го поплочи патот за незаборавно финале кое полека се прикрадува во шестата и последната епизода.
Како и претходните епизоди така и во Freedom Fighters, агентот 47 има целосна слобода во пристапот, а присутни ќе бидат и 70 предизвици чие комплетирање ќе отклучува нова опрема, оружја и предмети.
Последната шеста епизода ќе биде сместена во Јапонија, а би требало да излезе некаде пред крајот на годинава. Штом излезе и последната епизода, Square Enix планира да ги пушти во продажба сите шест епизоди и три бонус мисии. Таквиот диск би се појавил во продавниците од 31 јануари.
Во случај да барате уште подеднакво-интересни наслови кои ќе излезат во септември, дефинитивно консултирајте се и со нашата листа со најочекуваните игри!
