Apple планира промена во стратегијата за издавање на iPhone, почнувајќи од 2026 година со два термини годишно. Microsoft претстави покомпактни верзии на своите Surface Pro и Laptop уреди, додека Samsung го засили своето присуство на аудио пазарот преку купувањето на Bowers & Wilkins, Denon, Marantz и Polk. Во светот на гејмингот, Alienware најави нова, попристапна серија лаптопи Aurora, Nvidia RTX 5060 излегува следната недела. RTX 5090 е значително побрза во пробивањето на лозинки. Ова се дел од хардвер вестите од минатата недела.
Во иднина новите iPhone ќе излегуваат два пати годишно
Од 2026 година новите iPhone телефони ќе започне да излегуваат два пати во годината. Apple, веројатно за да си ја олесни работата со добавувачите ќе издава нови телефони два пати годишно. Септемврискиот термин во кој компанијата традиционално претставува нови уреди ќе остане за помоќните и поексклузивни Pro модели. Стандардните модели од истата серија ќе бидат претставувани, и ќе излегуваат напролет, неколку месеци по Pro моделите, пишува Information.
Компанијата веројатно проценила дека ова ќе им овозможи да продаваат повеќе телефони. Секако, ова и не е преголемо изненадување. Apple веќе претставуваше телефони во два термини. Компанијата имаше посебен термин за помалиот iPhone SE, а ова година го претставија и iPhone 16е надвор од „главната“ конференција во септември.
Првите телефони за кои ќе важи ова ќе бидат уредите од iPhone 18 серијата. iPhone 18 Pro и iPhone 18 Max, ќе бидат дел од есенското претставување, а стандардните модели и е-моделите ќе бидат претставени пролетта 2027 година.
Нов помал Surface Pro и Surface Laptop
Microsoft минатата недела ги претстави новите, помали верзии на своите Surface уреди: 12-инчен Surface Pro таблет/хибрид и 13-инчен Surface лаптоп. Овие нови модели се дизајнирани како покомпактна алтернатива на постоечките Surface Pro и Surface Laptop уреди. Сепак новите уреди нема да бидат директна замена на постоечките. Microsoft објави дека ова се нови Copilot+ AI и Arm-базирани уреди, кои првпат беа лансирани минатата година.
Главна карактеристика на новите уреди е нивната помала големина и значително помала тежина. 12-инчниот Surface Pro е 250 грама полесен од 13-инчниот модел. Новиот 13-инчен Surface Laptop е полесен за 150 грама. Oваа намалена тежина доаѓа со одредени недостатоци, најмногу кај екраните. Екраните имаат пониска резолуција и помал рефреш (90Hz за Pro, 60Hz за Laptop) во споредба со поголемите модели. Surface Pro нема опција за OLED екран.
Складирањето е со UFS меморија (256GB или 512GB), за разлика од SSD во другите Surface уреди големината не може да се зголеми подоцна. Microsoft исто така се откажа од Surface Connect портата, потпирајќи се само на USB-C за полнење. Сепак, лаптопот задржа USB-A порт и приклучок за слушалки.
Што се однесува до хардверот, двата нови Surface уреди доаѓаат со осум-јадрена верзија на Snapdragon X Plus, кој вклучува NPU со 45 TOPS и Adreno графички процесор. Имаат 16GB RAM меморија и опции за UFS складирање од 256GB или 512GB. Екранот на 12-инчниот Surface Pro е LCD со резолуција од 2196×1464 и максимум 90Hz рефреш. 13-инчниот Surface Laptop има 13-инчен 1080p 60Hz LCD екран. Двата уреди имаат по две USB-C/USB 3.2 порти (со поддршка за брзо полнење од 45W за Pro и 60W за Laptop). Разочарување е што Surface Pro не доаѓа со полнач. Surface Laptop вклучува 45W полнач.
Што се однесува до цените, основниот модел на 12-инчниот Surface Pro чини 800 долари. Како и за останатите уреди, тастатурата за Surface Pro се купува одделно и чини дополнителни 149 долари. Цената на 13-инчниот Surface Laptop започнува од 900 долари. Продажбата на уредите започнува на 20 мај.
Samsung ќе плати 350 милиони долари за Bowers & Wilkins, Denon, Marantz и Polk
Samsung е нов сопственик на брендовите Bowers & Wilkins, Denon, Marantz и Polk. Компанијата преку својата подружница Harman International ги купи овие брендови од Masimo за 350 милиони американски долари. Познатите брендови ќе се приклучат на постоечките брендови на Harman под капата на Samsung, како што се JBL и Harman Kardon. Договорот треба официјално да биде финализиран до крајот на 2025 година, по добивање на регулаторни одобренија. Иако 350 милиони долари не се мала сума, ова не е највисоката цена која Samsung ја платил за аудио одделот. Во 2016 година компанијата плати 8 милијарди долари за Harman.
Оваа инвестиција има за цел да ја зацврсти водечката позиција на Samsung на глобалниот пазар за аудио производи за широка потрошувачка. На глобалниот пазар, Harman веќе има 60% удел во пазарот на преносни аудио уреди. Samsung планира да ги искористи аудио технологиите на купените брендови во своите паметни телефони, телевизори, безжични слушалки, и други уреди. Ова треба дополнително да го подобри квалитетот на звукот и ќе понуди подобар избор за корисниците.
Alienware претстави нови поевтини лаптопи
Alienware секако не е познат по ниската цена на своите компјутери. Додавањето на нова серија поевтини лаптопи нема да гo промени ова, но Aurora серијата сепак е значително поевтина од Area 51 моделите.
Новата линија на лаптопи Alienware Aurora има пониски цени почнувајќи од 1150 долари. Ова се првите Aurora лаптопи по речиси 20 години, а ги вклучуваат моделите Alienware 16 Aurora и 16X Aurora.
Основната верзија на Alienware 16 доаѓа со Intel Core 5 процесор, NVIDIA GeForce RTX 3050 GPU и 8GB RAM, но може да се конфигурира со подобри компоненти. Серијата 16X Aurora има Intel Core Ultra процесори, со повеќе RAM и простор за складирање. Двата модели доаѓаат со истите графички картички. Основниот модел е со NVIDIA GeForce RTX 3050. Сепак лаптопот може да се надгради и со помоќната графичка картичка NVIDIA GeForce RTX 5070.
Цените за 16X Aurora сè уште не се објавени. Поскапата Area 51 серија гејминг лаптопи, започнува од 3200 долари и има подобри перформанси и уникатен дизајн.
Nvidia RTX 5060 излегува на 19 мај
Новата графичка картичка на NVIDIA, GeForce RTX 5060, ќе биде достапна од 19 мај по официјална цена од 299 американски долари. За жал очекувањата се дека ќе биде невозможно да се најде за препорачаната цена.
Картичките од xx60 сериите се одлични за буџет гејминг. За играње на 1080р практично и не е ниту потребна подобра картичка.
RTX 5060 има 8 GB GDDR7 VRAM, 19 TFLOPS Blackwell shader јадра, 5-та генерација tensor јадра со 614 AI TOPS перформанси и 4-та генерација RT (ray tracing) јадра кои достигнуваат 58 TFLOPS. Картичката доаѓа со 3,840 CUDA јадра.
Според тестирањата на NVIDIA, на 1080р и максимални сетирања, картичката постигнува супер фрејмрејт (над 150fps) во игри како Hogwarts Legacy, Cyberpunk 2077, Avowed и Marvel Rivals.
GeForce RTX 5060 ќе биде достапна за продажба на 19 мај. Лаптопите со мобилната верзија на RTX 5060 ќе бидат лансирани истовремено, со почетна цена од 1099 долари.
Nvidia RTX 5090 добра за пробивање на лозинки
Новата графичка картичка на Nvidia, RTX 5090 има значително подобри перформанси во споредба со претходната RTX 4090 кога станува збор за пробивањето на лозинки. Според тестовите на Hive Systems, RTX 5090 може да пробие 8-цифрена нумеричка лозинка за само три часа. Тоа е 33% побрзо од RTX 4090. Кога се користат 12 вакви картички заедно, едноставни 8-карактерни лозинки може да се пробијат за помалку од 15 минути, пишува Tom’s Hardware.
Секако, сложеноста на лозинката има големо влијание врз времето потребно за нејзино пробивање. Додека 8-карактерни лозинки составени само од броеви може релативно брзо да се пробијат, оние кои вклучуваат мали и големи букви би им одзеле на 12 RTX 5090 картички околу 62 години. Дополнителното додавање на симболи го зголемува тоа време на 164 години.
Иако RTX 5090 е значително побрза при пробивањето на посложени лозинки (дури и двојно побрза од RTX 4090 во одредени сценарија), сложените лозинки и натаму остануваат безбедни за овие пробивања.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
