Гневните птици ги срушија Nоkia и Microsoft, нема Angry Birds Space за Windows Phone

Ние сме број еден апликација на Windows Phone, но напорно е да ја оддржуваме, вели главниот за маркетинг во Rovio, Питер Вастербачка, во интервју за Bloomberg во кое искоментира дека нема да има Angry Birds Space за платформата на Microsoft. Ова кратка изјава одеднаш стана сериозен удар врз Nokia и Microsoft кои се надеваат дека Windows Phone 7 ќе стане конкурентна платформа на мобилниот пазар. Проблемот е јасен: ако нема апликации, ќе нема ни корисници.

Директорот на Rovio, Mикаел Хед побрза да го негира г. Вастербачка, велејќи за Reuters дека Rovio работи на Angry Birds Space за Windows Phone, но не даде датум кога ќе биде достапна таа верзија.

Kолку и да звучи банално, Windows Phone не може да се стане конкурентен без Angry Birds Space. Најновото „вселенско“ продолжение на играта, достапно на iOS, Android, дури и на десктоп компјутерите, за само еден ден стана најпродаваната мобилна игра на Apple App Store. Всушност, Angry Birds Space стана најпродавана мобилна игра во 28 земји! За жал, сега за сега корисниците на Windows Phone можат само да гледаат како другите се забавуваат во Вселената.

Со незаинтересираноста да креираат верзија за Windows Phone, Rovio ги стави Microsoft и Nokia во тешка ситуација. Двете компании сега мора да ги убедат другите програмери дека Windows Phone е добра платформа, и покрај очигледниот факт дека Rovio со својата најпопуларна апликација не гледа причина зошто да се замара околу неа.

Интересно, во истиот ден со претставување на Angry Birds Space се објави и вест дека Windows Phone Marketplace сега има над 70.000 апликации, пораст од декември кога имаше десет илјади помалку. Но, што ќе ви се толку апликации кога ја немате најпопуларната, нели?