Европската Унија сериозно размислува да воведе нов начин за справување со сајбер-тероризмот. Унијата планира да креира нова единица за анти-тероризам, која ќе биде дел од Europol и ќе биде задолжена за отстранување на повиците за Џихад на Интернет, јави Financial Times.
Единицата треба да биде подржана од сите држави членки на Унијата, а би функционирала под името Internet Referral Unit. Нападите во Париз и заканите за напади во останатите членки го забрзаа креирањето на единицата, велат претставници на ЕУ, кои го гледаат Интернетот како платформа за радикализација на младите, преку екстремистички содржини и директен контакт. Единицата ќе биде задолжена за детекција на содржини кои подржуваат тероризам и екстремизам, и оттука соработка со полицијата и останатите агенции.
Дополнително, ќе се воведе регулатива која ќе ги обврзе земјите-членки и големите компании од банкарската и енергетската индустрија, да одговараат директно на единицата во случај на сајбер напад или обид на напад. Земјите-членки ќе треба да имаат свои единици што би можеле да реагираат брзо во спречување и детектирање на онлајн тероризмот, споделувајќи информации со останатите единици од други земји.
