Последниот ден од својот мандат Доналд Трамп го помилува инженерот осуден за кражба на компаниски тајни од Google, Ентони Левандовски.
Г. Левандовски е основач на стартапот за автономни камиони Otto; компанија која потоа стана дел од Uber. Левандовски беше инженер во Google, но кога ја напушти компанијата заедно со него ја зема и технологијата за автономни возила.
На судењето Google тврдеше дека контактот со Uber e уште пред да го напушти Google. Google го обвини г. Левандовски и дека пред да ја напушти компанијата, на екстерен хард-диск снимил 14 000 фајлови, со големина од 9,7 GB. Дел од овие фајлови е и дизајнот на LiDAR плочката која Google (сега Waymo) ја користи во своите автономни возила.
На читањето на пресудата судијата кажа дека тоа е „најголемата кражба на компаниски тајни која некогаш ја видел“, вели Engadget.
Судскиот спор резултираше со 18 месечна затворска казна за г. Левандовски; Google доби дел од Uber во вредност од 245 милиони долари; а Uber вети дека нема да ја користи технологијата. Г. Левандовски требаше да започне да ја отслужува казната по пандемијата, но секако тоа нема да се случи.
Поддршка за г. Левандовски и барање за негово помилување дојде од основачот на PayPal, Пител Тиел и креаторот на Oculus VR, Палмер Лаки.
За жал дел од помилуваните не беа Едвард Сноуден или Џулијан Асанж.
