По огромниот успех на оригиналниот Citizen Sleeper, најавата за продолжението, Citizen Sleeper 2: Starward Vector, предизвика значителен интерес кај љубителите на наративните RPG игри. Ова е игра која, на времето, беше двојно импресивна затоа што беше развиена од страна на едночленото студио Jump Over the Age. Инвентивниот Герет Демијан Мартин успеја да привлече легија од фанови. Сега, одново се навраќа и преку втората игра ветува не само проширување на уникатниот свет и механики, туку и продлабочување на емотивното патување кое го дефинираше неговиот претходник. Сместена во Ѕвездениот Појас – опасна, но живописна мрежа на астероидни живеалишта – играта нè враќа во улогата на спијач, вештачка интелигенција со човечки спомени, во очајничка борба за опстанок и идентитет.
Приказна за бегство и потрага по смисла
Во наративната срж на Citizen Sleeper 2 останува длабоко лична и интроспективна приказна. Подгответе се одново да се соочувате со егзистенцијалната тежина која доаѓа од емулацијата на човечки ум во синтетичко тело. Овојпат имате и дополнителни компликации кои произлегуваат од неисправно тело, цена на главата и амнезија. Бегството од семоќната корпорација што ве создала, како и од канџите на локалната банда предводена од Лејн, поставува мрачен тон уште од самиот почеток. Во очајнички обид за да станете слободни, кој вклучува и препишување на сопствениот код, само се зголемуваат влоговите и се нагласува постојаната борба за автономија. Доколку сакате игри со силна приказна, шансите се дека целосно ќе бидете преземени од комплексните морални дилеми и разгранетите наративни патеки, каде секој избор има потенцијал да ја обликува не само судбината на ликот, туку и светот околу него.
Еволуција на системот со коцки
Citizen Sleeper 2 останува верен на своите корени инспирирани од tabletop игрите, каде фрлањето коцки е централна механика за решавање на предизвиците. Сепак, системот еволуира со воведување на нови елементи. Секоја класа на ликови сега поседува уникатна push способност, која може да се надградува и прилагодува. Оваа способност додава нов слој на тактичка длабочина, овозможувајќи во, од една страна, да манипулирате со среќата, но, од друга, си додавате ризик од потенцијални негативни последици. Управувањето со ресурси како што се коцките (кои претставуваат енергија или време), справувањето со стресот и системските glitches остануваат клучни за преживување.
Новитет во продолжението се и договорите – високоризични, повеќефазни мисии кои бараат внимателна подготовка, стратешко планирање и способност за адаптирање на непредвидени ситуации. Овие договори, кои се движат од истражување на напуштени вселенски бродови до ризични грабежи, ветуваат пофокусирано и тактички побогато гејмплеј искуство. Собирањето на екипаж, каде секој член има свои вештини, приказни и проблеми, и надградбата на вашиот брод, rig, додаваат уште еден слој на стратешко одлучување и персонализација.
За разлика од релативно статичната локација во првата игра, Ѕвездениот Појас во Citizen Sleeper 2 нуди значително поголем и поразновиден универзум за истражување. Па така, овојпат имате слобода да патувате помеѓу различни хабови, секој со свои уникатни карактеристики, ликови и можности. Овој жив свет, кој реагира на вашите акции, ја наградува љубопитноста и внимателното истражување. Одлуката каде да се инвестира време и ресурси станува уште позначајна, бидејќи секоја локација и приказна нудат различни награди и предизвици. Новите проверки на вештини, кои овозможуваат поизразено влијание на класата и карактерот врз интеракциите, дополнително ја збогатуваат слободата на избор.
Еден од најсилните адути на оригиналниот Citizen Sleeper беше неговата уникатна визуелна естетика и атмосферична музика. За продолжението, Герет Демијан Мартин повторно соработува со реномираниот стрип-уметник Гијом Сингелин и прославениот композитор Амос Роди. Оваа докажана комбинација на таленти ветува дека и Citizen Sleeper 2 и понатаму нуди впечатливо визуелно искуство, со карактеристичен уметнички стил кој совршено ја доловува дистописката атмосфера, надополнето со евокативна музика која ја продлабочува емотивната резонанца на приказната.
Достоен продолжеток
Citizen Sleeper 2: Starward Vector не само да ги исполни високите очекувања поставени од неговиот претходник, туку и да ги надминува. Со проширен свет, еволуирани гејмплеј механики, и задржување на фокусот врз длабоката нарација и значајните избори, играта ветува уште едно незаборавно патување низ мрачниот, но интригантен научно-фантастичен универзум. Фокусот на личната борба на спијачот за опстанок, идентитет и иднина, во комбинација со тактичките предизвици на животот во Ѕвездениот Појас, создава привлечна мешавина која сигурно ќе ги освои како старите фанови, така и новите играчи кои трагаат по интелигентна и емотивно ангажирачка RPG авантура. Citizen Sleeper 2: Starward Vector е дефинитивно наслов што вреди да се провери, особено, како што кажавме, доколку сакате комплексни RPG игри каде вашите избори ја обликуваат понатамошната авантура.
Повеќе детали за играта
- Произведува: Jump Over The Age
- Издава: Fellow Traveller
- Жанр: наративна авантура
- Платформа: Microsoft Windows, конзоли
- Излезена на: 31 јануари 2025
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
