{mosimage}BlackBerry Bold 9000 e паметен телефон создаден од компанијата Research In Motion (RIM) најавен уште пред 5-6 месеци а со планови официјално да се пласира на американскиот пазар пред почетокот на 2009 година. Сосема случајно успеавме да го начекаме овој паметен телефон чие објавување беше одложено неколку пати и ексклузивно да го рецензираме за читателите на IT.com.mk.
BlackBerry Bold 9000 е мобилен телефон со димензии 114 мм х 66 мм х 15 мм кој тежи околу 135 грама со вградена QWERTY тастатура и TFT LCD дисплеј со преполовена VGA резолуција од 480 х 320 пиксели која поддржува повеќе од 65.000 бои. Телефонот има можности за СМС, ММС, е-маил, интернет преку интегриран RIM безжичен модем, ИМ, вграден GPS, BlueTooth, организатор, 2.0 мега пиксели камера со вграден блиц и дигитален зум и 1 гигабајтна меморија.
{mosimage}
Изглед
BlackBerry Bold 9000 има заоблени краеви и е обоен во црна боја со сребрени и бели елементи и има примамлив изглед за секого, иаку е далеку од изгледот на iPhone-от. За разлика од останатите паметни телефони, Bold 9000 сепак е значително поголем и зазема повеќе простор.
Задната страна на телефонот каде што се наоѓа камерата е покриена со материјал кој дава кожен ефект, а на страните на телефонот се наоѓаат копчињата за активирање на камерата и регулирање на звукот, USB порт, место за MicroSD картичка која ќе морате самите да ја купите бидејќи не доаѓа со телефонот и место за вклучување на слушалки со приклучок од 3.5 мм.
Екранот со 2.75 инчи дава доста јасна, чиста и светла слика и иаку не е перфектен и малку е ограничен со само 65.0000 бои, сепак е еден од најдобрите дисплеји кога се во прашање паметните телефони, дури и на дневно светло.
{mosimage}
Перформанси
Телефонот има инсталиран BlackBerry 4.6 оперативен систем кој овозможува доста лесен и практичен интерфејс како и подобрена функционалност. Бидејќи BlackBerry телефоните сепак се познати по е-маил опцијата, RIM и во овој случај разбирливо големо значење придава кон оваа функција и нуди можност за е-маил синхронизирање со разни софтвери (Microsoft Exchange, IBM Lotus Domino, Novell GroupWise, Enterpirse Server и сл.). Дополнително, преку интернет конекцијата ќе можете да пристапите до 10 POP3 или IMAP4 е-маилови.
Со софтверскиот пакет инсталиран во телефонот кој ги содржи сите функции кои еден мобилен телефон ги има, накнадно ќе можете и да отворате и прегледувате фајлови од Microsoft Word, Excel, PowerPoint, Corel WordPerfect, PDF, и слики во JPEG, GIF и други формати. Со помош на инсталираниот DataViz Documents To Go Standard Edition, ќе можете и да ги уредувате овие фајлови.
Телефонот има можност и за мултимедија, па така има вграден медиа плеер кој е добар за голем број на аудио и видео формати, вклучувајќи MP3, WMA, AAC, AAC+, MIDI, MPEG4,WMA, DivX4, XviD, H.265 и др. Како што рековме, телефонот има 1 ГБ вградена меморија со можност за надоградување преку MicroSD картичка до 16 ГБ.
Камерата со 2 мега пиксели и блиц, 5х дигитален зум и можност за снимање видео, не е баш најсилната страна на Bold 9000. Со интересна можност за гео-означување на сликите преку GPS опцијата, самите слики со максимална резолуција од 1600 х 1200 пиксели не содржат којзнае каков квалитет и се типични за мобилни телефони. Исто така сликите можете директно да ги испраќате преку е-маил, ММС, Bluetooth, или пак Facebook.
Интернет пребарувањето преку Bold 9000 ги содржи сите стандардни функции кај прелистувачите и овозможува да зумирате на одредени делови од сајтовите, да создавате прелистувачка историја низ која лесно ќе навигирате и сл. Со можност за добивање на 3G сигнал, телефонот теоретски нуди можност за брзина од 300 до 700 kbps.
Телефонот е базиран на 624 MHz Intel PXA270 процесор, кој овозможува подобро и побрзо користење, за разлика од BlackBerry претходниците кои се базирани на 312 MHz процесори.
Заклучок
BlackBerry Bold 9000 е одлична комбинација на атрактивност, елегантност и голема практичност. И додека од компанијата Research In Motion најавуваат дека оваа верзија на BlackBerry паметните телефони е наменета и за обичниот корисник наспроти досегашните најчесто бизнис корисници, сепак цената (која ќе биде некаде околу 500 US долари на европскиот пазар) е пресуден фактор и очекуваме групата на корисници да си остане скоро иста. За разлика од iPhone или G1 на T-mobile, Bold 9000 е далеку покорисен и поедноставен за користење.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
