GFA Games е студио за развој на видеоигри, со седиште во Белград. Основано од тим страствени програмери, српското студио се фокусира на спојување на богата нарација, динамичен гејмплеј и впечатлив визуелен дизајн. Сосема неочекувано, добивме ексклузивна можност да ја тестираме нивната дебитантска игра, PIONER. Станува збор за пукачка игра во прво лице, сместена во маѓепсан пост-апокалиптичен отворен свет. Десетчасовното демо беше доволно за да нѐ остави без здив. PIONER е игра која не само што се игра, туку се доживува. Нејзината атмосфера, приказна и гејмплеј се толку длабоки и привлечни, што без двоумење ја ставивме на врвот на нашата листа на најочекувани игри за 2025 година.
Постапокалиптична идила
Првичното навлегување во светот на PIONER остава длабок впечаток, почнувајќи од визуелно зачудувачката графика, преку обемното истражување, па сѐ до беспрекорната флуидност на движењето и интензивните борби. Светот е извонредно дизајниран, изобилува со живописни локации кои нудат длабок увид во богатиот наратив. Графичкиот енџин е брилијантно оптимизиран, овозможувајќи стабилни и високи фрејмови независно од тоа што се случува на екранот.
Сепак, она што навистина го издигнува PIONER на повисоко ниво е неговиот борбен систем. Вашиот лик се движи со грациозност и прецизност, лесно совладувајќи пречки со трчање, скокање, качување и лизгање, како искусен теренски војник. Ракувањето со оружјето е исклучително задоволително, со автентично чувство на тежина и моќност при секое движење и истрел.
Нашите несигурни почетоци во демото:
Брутална акција во безмислосен свет
Оружјата во PIONER се артефакти на пост-апокалиптична инвентивност. Обично се дизајнирани со невообичаена визија и замислени да пружаат уникатни, визуелно впечатливи можности за деструкција. Секое парче оружје е внимателно изработено, со специфични карактеристики кои го отсликуваат суровиот и хаотичен свет на играта. Меѓутоа, моќта што ја поседуваат овие оружја е балансирана со константна потреба за муниција, принудувајќи не често да се потпираме на прецизност и стратегија. Секој истрел мора да биде премерен, а нишанењето во критичните точки на непријателите е од клучно значење за опстанок, нешто што знае да биде тешко кога сте опкружени од сите страни.
Совршенство со мани
На почетокот, непријателите се манифестираат како зомбифицирани суштества со предвидливи шеми на движење и напади. Но, како што играта напредува, се отвора свет на разновидни, мутирани и застрашувачки противници, принудувајќи не да се прилагодуваме и да ги усовршуваме нашите борбени вештини. На моменти, движењето на одредени непријатели знае да биде трапаво и неверодостојно, но ни беше објаснето дека финалната верзија ќе биде значително порафинирана.
Два клучни аспекти кои бараат дополнително внимание се синхронизацијата на текстот и подобрувањето на аудио конзистентноста. Иако актерската изведба во играта е на исклучително високо ниво, локализацијата е обележана со бројни правописни грешки и несовпаѓање на дијалозите. Дополнително, додека поголемиот дел од звучните ефекти на оружјето се реалистични и импресивни, во одредени меѓу-секвенци и борбени ситуации звукот делуваше неприродно, како да користите играчки. И покрај тоа што овие недостатоци се потенцијално лесно исправливи, сепак значително влијаеја на нашето севкупно искуство.
Сепак, она што нѐ загрижува е наративниот аспект на играта. Иако визуелно и гејмплејски импресивна, приказната во “PIONER” засега делува неискусно изведена. Дијалозите се преопширни и честопати не нудат суштински информации, а клучните наративни моменти се разредуваат, што го отежнува одржувањето на целосно внимание. Се надеваме дека овој аспект ќе биде полиран до официјалното објавување, бидејќи потенцијалот на светот кој е создаден, заслужува побогата и поконцизна наративна рамка.
PIONER веќе го освојува вниманието на гејмерската заедница, ветувајќи не само огромен, туку и длабоко атмосферски свет кој се протега на импресивни 50 квадратни километри. Испреплетен со мистериозни скриени зандани и непредвидливи авантури, играта ветува потопување во еден динамичен екосистем каде што секој ваш чекор е клучен: градење сложени односи со различни фракции, работење напорно за да ја освоите нивната лојалност и отклучување уникатни награди што ќе ви помогнат во вашето патување.
Во оваа безмилосна средина, ќе мора да ги балансирате и вашите основни потреби – да се грижите за гладот, одморот и ресурсите, додека истовремено работите на надградба на оружјето, прилагодувајќи го вашиот арсенал за да ги надминете предизвиците што претстојат.
PIONER не е само игра, туку е длабоко искуство кое ги тестира вашите вештини за преживување, стратешко размислување и способност за адаптација во еден свет кој преколнува да биде истражен. Елементите на истражување, графика и борба се јасно инспирирани од легендарните наслови како Metro и Stalker, но сепак, овде се доведени до уште повисоко ниво на интензитет, нудејќи незаборавно и брутално искуство.
GFA Games е студио кое има потенцијал да остави значаен белег на светската гејминг сцена. Со нивниот претстоен наслов PIONER, тие ветуваат да донесат свеж и иновативен пристап кон пост-апокалиптичниот жанр. Ова е студио кое вреди да се следи, бидејќи тие се посветени на создавање на исклучителни гејминг искуства кои ќе ги воодушеват играчите ширум светот. Секоја минута помината во оваа игра е доказ за огромниот труд и посветеност на креаторите. Нивната страст и внимание на деталите се очигледни во секој аспект на играта, од дизајнот на нивоата до звучните ефекти. Едвај чекаме да видиме како понатаму ќе се развива играта и какви нови изненадувања ќе ни донесе.
Повеќе детали за играта
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
