Поодамна, ве запознавме со начинот на кој можете да имате целосна контрола врз партициите со MiniTool Partition Wizard Free. Апликацијата и понатаму останува одличен избор, а EaseUS Partition Master е само одлична алтернатива.
Овие програми се повеќе од неопходни доколку сакате да го поделите вашиот хард диск на повеќе партици. Имено, хард диск од 2 TB е многу полесен за справување кога се подели на три или четири „делчиња“, односно партиции; една, помала, за оперативниот систем, друга за личните фотографии и видеа, трета за музика и филмови (доколку сѐ уште не им пружате шанса на сервисите за стриминг), а четврта за игрите. Ваква или слична поделба е апсолутно можна со основната, вградена Windows алатка за партиции, но други, дополнителни алатки, како двете горе-споменати, можат значително повеќе.
EaseUS Partition Master free може да создава партиции, или да ја менува големината на веќе создадените; може да форматира, или целосно да избрише, како и да конвертира; може да менува букви на партиции, или целосно да ги сокрие од системот.
Во случај да префлувате содржини од еден во друг драјв, апликацијата ви дозволува да копирате дискови, како и да пробате да повратите изгубени податоци.
EaseUS Partition Master беспрекорно работи со хард дискови чија големина е до 8TB, а се испорачува и со алатка за чистење и оптимизација на хард дискот.
Последната тринаесета верзија се одликува со визуелно променет интерфејс и подобри можности за заштита на податоците доколку биде прекинат процесот на преселба, односно при промена на големина на партициите.
