Murdoch Alert е додаток за Firefox кој ќе ве предупреди доколку отворите некој од 100+ сајтови кои се контролирани од фамилијата Мурдок. Додатокот исто така ве предупредува доколку читате вест која е дојдена од сајтовите на австралискиот медиумски могул.
Руперт Мурдок и неговата News Corp. неодамна беа вклучени во неверојатен скандал со нивниот весник News of the World. Беше откриено дека NotW хакнувал мобилни телефони на познати личности, политичари, британски војници и киднапирани деца со цела да дојде до вести, дури и ги бришеле гласовните пораки без знаење на корисниците со цел да направат место на телефонот за уште.
Креирањето на Murdoch Alert додатокот, кој се објави пред еден ден, е мотивирано од агресивното и неетичко работење на фамилијата Мурдок во потрага по моќ. Претходно, во тек на парламентарното сослушување на Руперт Мурдок, беше објавенa и Firefox и Chrome екстензија Мurdoch Block која не опоменува дека сте на сајт во сопственост на Мурдок, туку комплетно го блокира.
(via Gawker)
