Meta треба да плати 567 милиони долари за подобрување на менталното здравје на децата

Судија во Њу Мексико ѝ нареди на Meta да плати 567 милиони долари во фонд за кој ќе го помогне подобрувањето на менталното здравје на децата и суштински да го измени начинот на кој Facebook и Instagram функционираат за малолетни корисници во таа држава. Одлуката, донесена доцна во четврток, е втората фаза од процес што компанијата веќе го изгуби во март и е една од првите во која американски суд третира дизајн на социјална мрежа по правната доктрина за јавна пречка, истата што историски се применувала врз фабрики што загадуваат.

Каде одат парите

Судијата Брајан Бидшид од Првиот судски округ во Санта Фе определи најголемиот дел од сумата, 420 милиони долари, да оди за услуги за лекување на млади луѓе. Остатокот е наменет за подигање на свеста и превенција, за скрининг и проценка, за упатување и координација, како и за евалуација на самата програма. Средствата се распоредени на пет години.

Износот доаѓа над 375-те милиони долари граѓански казни што поротата ѝ ги досуди на Meta во март, кога утврди дека компанијата свесно го оштетила менталното здравје на децата и криела што знае за сексуална експлоатација на деца на своите платформи. Вкупната изложеност сега надминува 940 милиони долари.

Вреди да се забележи и тоа што судот не го прифати. Државата бараше една милијарда долари како дел од план вреден 3,7 милијарди за подобрување на услугите за ментално здравје на децата во Њу Мексико, што го пренесува Albuquerque Journal. Досуденото е речиси половина од тоа.

Изгледот на апликациите ќе се менува

Финансискиот дел е помалку интересниот. Пресудата содржи и низа обврски што директно го засегаат производот.

Meta мора да изгради банери и информативни екрани што јасно ги објаснуваат заштитните функции, добрите практики и алатките за справување со непримерни коментари, и да ги прикажува редовно. Тие измени, заедно со едукативна кампања во Њу Мексико, ќе подлежат на ревизија од државата.

Компанијата мора да продолжи да ги подобрува алатките за проценка на возраст, кои се потпираат на вештачка интелигенција што ја проценува возраста врз основа на сигнали како кои се пријателите на корисникот и каква содржина објавува и консумира. Во следните две години Meta е должна да се обиде да развие посебен модел за предвидување корисници под 13 години.

Дополнително, за корисници во Њу Мексико за кои проценува дека се под 13 години, Meta мора да побара доказ за возраст. Ако утврди дека некој е под 13, или под 18 без можност да се процени точна возраст, корисникот мора да се третира според построгиот режим сè додека не ја потврди возраста. Компанијата треба да склучи партнерство со училишта или организација за безбедност на деца за портал преку кој училишен персонал ќе може да пријавува сомнителни профили, и мора да ги избрише личните податоци собрани од корисници под 13 години.

Извештај за напредокот се поднесува двапати годишно, на 30 јуни и 31 декември, во период од пет години.

Границите на пресудата

Судот експлицитно призна дека федералното право го ограничува неговиот дофат. Според Законот за заштита на приватноста на децата на интернет (COPPA), судот не може да ѝ нареди на Meta да бара од деца под 13 години да поднесуваат лични податоци или пасивно да ги следи, дури ни заради проверка на возраст.

Судот забележа и дека наметнување на верификација на возраст само за Meta, а не и за останатите социјални мрежи, би било „неправично и непотребно штетно“ за компанијата. Тоа е признание за структурниот проблем: регулација што се применува врз еден играч, а не врз целата индустрија, ретко ја решава причината.

Реакциите

Главниот обвинител на Њу Мексико, Раул Торез, кој ја покрена тужбата во 2023 година, ја нарече одлуката потврда дека компаниите ќе одговараат кога дизајнот на нивниот производ свесно ги изложува децата на ризик.

„Денешната одлука е победа за секој родител што се загрижил што ѝ прави социјалната мрежа на неговото дете“, изјави Торез, според PBS News.

Meta најавува жалба. „Не се согласуваме со одлуката и ќе поднесеме жалба“, соопшти портпарол на компанијата, додавајќи дека Meta работи напорно на безбедноста и останува уверена во својот запис на заштита на тинејџерите онлајн, како и дека ќе продолжи да се брани од тврдења што ги искривуваат фактите.

Ова не е изолиран случај

Пресудата се вклопува во поширок регулаторен притисок. Европската комисија двапати оваа година прелиминарно утврди дека Meta го крши Законот за дигитални услуги. Во април заклучи дека мерките за спречување пристап на деца под 13 години се неефикасни, меѓу другото затоа што при регистрација може да се внесе лажен датум на раѓање без никаква проверка. Во јули следеше втор наод, овојпат за зависничкиот дизајн на Instagram и Facebook, со фокус на бесконечно скролање, автоматско пуштање видеа, пуш-известувања и системите за препораки.

Ако наодите се потврдат, казната може да достигне до шест отсто од глобалниот годишен приход на компанијата. Meta соопшти дека не се согласува со прелиминарните наоди и дека тие не ги земаат предвид чекорите преземени со воведувањето на тинејџерските профили.