Најдете љубов или умрете трудејќи се со играта Find Love or Die Trying

Find Love or Die Trying е евтин, но интересен визуелен роман кој обработува невообичаена тема: да се најде љубов по секоја цена! Подгответе се да учествувате во телевизиското шоу каде разговарате со најразлични девојки и давате сѐ од себе за да се вљубите. Алтернативата е смрт.

Во сржта, Find Love or Die Trying е чисто крвен визуелен роман. Вашата задача е повеќе да сте пасивен набљудувач, да се восхитувате на чистите цртежи и суптилните анимации, да следите како се редат дијалозите и, од време на време, да донесувате одлуки кои ќе ве одведат кон еден од осум можни завршетоци. Играта е поодамна излезена за PC, но, од неодамна се појави и за конзолите.

Западно дејтинг шоу со јапонски battle royale примеси

Се наоѓате на прекрасен остров со пет преубави дами. Колку ќе уживате во тоа, меѓутоа, е дискутабилно. Имено, имате седум дена направите некоја од дамите да се вљуби во вас и да прифати да ви стане сопруга. Доколку успеете во мисијата ќе можете да си заминете од островот. Доколку не успеете, па, прочитајте го насловот на играта уште еднаш.

Да направите некој да се вљуби во вас воопшто не е лесно, особено под ваков временски притисок и во вакви вештачки услови. Дамите се убави, но секоја од нив се води од различни мотивации и е со различни размислувања. Поради тоа, воопшто не е лесно да го направите или кажете вистинското нешто како би можеле правилно да ги импресионирате.

Дијалозите се внимателно напишани и лесно ве “влечат” низ приказната. На располагање имате бројни комични ситуации кои лесно би можеле да ве заинтригираат. Низ четири часовната приказна, константно сте опсипувани од чисти цртежи со суптилни анимации, како и со впечатлива музичка подлога. Би сакале бројот на песните да е поголем, но, и вака како е, навистина не е лошо. За нас, не беше тешко да се вљубиме во играта, но да направиме некој да се вљуби во нас? Тоа е сосема друга приказна.