Хакерската група Desorden успеа да ја пробие заштитата на Acer и да дојде до 60 гигабајти податоци за корисниците на Acer. Веста за пробивањето на серверите на Acer најпрво ја објави хакерската група а потоа ја потврди и компанијата.
Дел од податоците кои се украдени се имиња, адреси, телефонски броеви, но и некои корпоративни финансиски информации, јави Digital Trends.
Напаѓачите успеале да ја пробијат заштитата на серверите на Acer во Индија и оттаму да украдат податоци за милиони корисници. Групата сподели видео во кое ги покажува украдените податоци и како пример бесплатно споделија податоци од 10 000 жртви на овој напад.
„Што го забележавме нападот веднаш ги активиравме безбедносните протоколи и лансиравме целосен скен на системите. Ги контактиравме сите потенцијални жртви во Индија. Инцидентот е пријавен до органите за спроведување на законот и до Индискиот тим за итна компјутерска реакција“, вели претставник на Acer за BleepingComputer.
За жал ова е дури втор пат Acer да биде жртва на голем онлајн напад оваа година. Пред седум месеци групата REVil ги „заклучи“ податоците на Acer и побара откуп од 50 милиони долари во криптовалутата XMR.
