Отварајте документи од Microsoft Office во Chrome

Google го реши проблемот на GNU/Linux корисниците кои се соочуваат со проблемите кои им ги приредуваат Microsoft Office документите. Отсега, Chrome корисниците ќе може да ги прегледуваат Word, Excel, PowerPoint и останатите документи директно преку својот прелистувач.

Не се работи за прикачување на документите на Google Drive или нешто слично, туку додатокот што го имаат развиено – Chrome Office Viewer овозможува директно отварање на документите преку прелистувачот.

Сепак, покрај едноставноста, според Jelte Liebrand, софтверски инженер, со ова се зголемува и безбедноста на корисниците. „Покрај тоа што го зачувува вашето време, Chrome Office Viewer, исто така, ве заштитува и од малициозни програми кои може да се пренесат преку Office документите. Баш како кај веб страниците и PDF документите, ние додадовме специјален сендбокс со што се попречуваат хакерите да ги украдат вашите приватни информации или да ги следат вашите активности.“