Microsoft е при крај во изработката на свој паметен телефон кој ќе биде претставен во наредниве месеци и ќе биде брендиран како Surface паметен телефон. Boy Genious Report пишува дека откако Microsoft ги изнервира своите партнери кои произведуваат хардвер со претставување на свој таблет компјутер Surface, сега тоа ќе го направи и со своите мобилни партнери со конкурентен WP8 телефон кој би требало да биде со квалитет на Аpple iPhone 5 или Samsung Galaxy S3.
Предноста на Microsoft пред партнерите е што има популарна софтверска платформа поради која, сакале партнерите или не, ќе мора да произведуваат Windows 8 таблет компјутери и Windows Phone 8 паметни телефони за да грабнат дел од тој огромен колач.
Според China Times, телефонот на Microsoft ќе се појави во првата половина на 2013-та година, но не пред да бидат објавени првите Windows Phone 8 телефони од другите партнери како Nоkia, Samsung и HTC.
