Adobe го повлекува Flash од GooglePlay. Oд денес, 15 август, сите сопственици на Android уреди кои до сега не симнале Flash нема да бидат во можност повеќе да го направат преземањето. Flash на Android платформата ќе биде целосно недостапно откако сите уреди ќе се префрлат на Android 4.1 Jelly Bean. Компанијата целосно ќе се посвети на Flash за PC, а делумна подршка ќе имаат и Windows 8 и Windows RT таблет компјутерите преку прелистувачот Internet Explorer 10.
Сепак до почетокот на август, најголем дел од корисниците, 98.5 проценти, сè уште не користат Android 4.1, а дури 60.6 проценти се на 2.3 Gingerbread. Поддршката за овие корисници ќе се остварува преку надградби и закрпи на постоечкиот софтвер. Иако Flash e популарен за Android, сепак Adobe вели дека плагинот за гледање мултимедија преку прелистувач покажува чудно однесување на Jelly Bean. Од 15 август на Google Play, Adobe ќе објавува единствено надградби и закрпи за уредите кој веќе имаат инсталирано Flash.
Тука ќе ја најдете листата на уреди за кои Adobe ќе обезбеди поддршка за Flash инсталиран пред 15 август. Доколку пак сакате да инсталирате Flash и по овој датум, најдобро ќе биде да се обидете да симнете .apk од сајтот на Adobe, само внимавајте бидејќи се работи за фајлови наменети за програмерите.
Ова е уште една победа за покојниот Стив Џобс кој беше најголемиот противник на Flash. Како промотор на HTML 5 тој никогаш не го прифати Flash на iOS платформите. Тој го претпочиташе HTML 5, пред се поради подобриот H264 формат, трошењето на батериите, безбедноста, но и непостоењето на поддршка за екраните на допир. Неколку години по славното писмо, речиси сите мобилни уреди имаат HTML5 поддршка кое се покажа како најдобро решение за презентирање на видео содржините во прелистувачите и на Android платформи. Дури и самите Adobe во своето соопштение од минатиот ноември признаа дека HTML5 е најдоброто решение.
