Регулаторите на двата континенти ја одобрија зделката меѓу Google и Motorola Mobility која беше најавена уште во aвгуст. Европската комисија и американското Министерство за правда официјално му ja одобриja аквизацијата на Google.
„По детален преглед на предложената трансакција, Дивизијата за спречување на монопол одлучи дека таквите аквизиции [на Motorola и нејзините патенти] не претставува опасност да ја намали конкуренцијата и ги затвараме сите три истраги.“, се вели во соопштението на Министерството за правда на САД.
Google за своите 12,5 милијарди долари ќе добие 17.000 патенти на Motorola врзани за стандарди за мобилни уреди и комуникација. Патентите ќе му дадат потпора на Android, мобилнот оперативен систем на Google, во битката против другите оперативни системи. Производителите на Android уреди, како Samsung, HTC и други, се постојано тужени од Microsoft и Apple заради прекршување на патенти кои се врзани со користење на Android. Поради патенти, Samsung и HTC веќе му плаќаат на Microsoft надоместо за секој продаден уред. Со патентите од Motorola, Google ќе може да ги заштити и охрабри производителите и понатаму да го користат Аndroid како своја основна платформа.
Властите од САД и Европската комисија го предупредија Google да го почитува FRAND договорот, односно да дозволи лиценцирање на конкурентите на патенти кои се врзани со индустриски стандарди.
„Koмисијата ќе продолжи да држи будно око врз однесувањето на сите играчи на европскиот пазар, посебно врз зголеменото стратешко користење на патентите.“, предупреди евро-комесарот задолжен за конкуренција на пазарот, Жоакин Алмунија.
Што се однесува до самата Motorola Mobility, Google вели дека компанијата ќе продолжи да функционира самостојно.
