Во знак на протест, 18.000 академски трудови од JSTOR се закачени на Pirate Bay

Пред два дена објавивме вест за онлајн активистот Арон Шварц кој е обвинет за крадење на академски и научни трудови од порталот JSTOR, и кому му се заканува 35 годишна затворска казна. Интересно околу овој случај е тоа што вчера на озогласениот торент сајт Pirate Bay се најде торент кој содржи 18.592 трудови од порталот JSTOR.

Торентот е качен од Грег Максвел кој вели дека причината за овој потег е одговор на апсењето на Арон Шварц. Според него не треба да се ограничува пристапот кон било какви академски трудови и не треба одредени поединци да имаат профит од нивно задржување и препродавање. Поголемиот дел од авторите на овие трудови немаат финансиски бенефит од нивните дела, бидејќи според Максвел тие се под притисок да објавуваат научни трудови, а таа ситуација ја користат издавачите.

Според Максвел, колекцијата која е качена е здобиена на легален начин, и дека сите трудови во неа датираат пред 1923 година, и припаѓаат во јавниот домен. Грег размислувал да ги качи анонимно, но знаел дека тоа ќе биде искористено против Арон Шварц.

Целосниот торент, кој тежи 33 GB и е пропратен со манифестот на Грег Максвел, можете да го преземете од следниот линк.