Во случај да барате игра со меланхолична приказна и бројни загатки поврзани со фотографирањето, тогаш ви препорачуваме да ја проверите играта на Silver Lining Studio и PLAYISM. Како втора игра на студиото, The Star Named EOS одлично се надоврзува на феноменалната Behind the Frame: The Finest Scenery и нуди ново невообичаено патување кое е испреплетено со предизвикувачки загатки.
Гејмплеј заснован на загатки
Преку истражување на теми поврзани со фотографирање, The Star Named EOS го соочува играчот со бројни, интелигентно осмислени загатки. Играта се одликува со преубави локации, трогателна приказна која се раскажува преку рачно-нацртани цртежи и, како што кажавме, бројни загатки кои се слични на escape room концептот. Играјќи со Дај, ќе истражувате најразлични фотографии и ќе пробате правилно да се присетите за одредени настани поврзани со исчезнувањето на неговата мајка.
The Star Named EOS е исклучително кратка игра која можете да ја завршите за час-два. Но, тие два часа се мајсторски осмислени за да ве вовлечат во преубав универзум и интересни загатки кои нема лесно да ги решите, а долго ќе ги паметите. Често ќе го поминувате времето стапувајќи во интеракција со бројни предмети и гледајќи дали и како може да се искористат за напредување во приказната. Иако голем број од загатките се логични, често се наоѓавме во ситуација да се учиме преку грешки и долго експериментирање. Но, во моментот кога ќе го најдете решението и ќе преминете на друга локација маките од претходните загатки лесно се забораваат.
Доколку не ви интересен escape room концептот, како и point & click игри со примеси на hidden object, тогаш не знаеме колку ќе уживате во оваа игра. Но, доколку сте фанови на вакви авантури и спремни сте да ризикувате едно попладне за магично потопување во впечатлив свет, тогаш дефинитивно проверете ја The Star Named EOS. За пофалба е и релаксирачкиот саунтрак кој емоционално ве охрабрува да го издржите патувањето до крај.
Повеќе детали за играта
- Произведува: Silver Lining Studio
- Издава: PLAYISM
- Жанр: авантура
- Платформа: Microsoft Windows
- Излезе на: 23 јули 2024
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
