Повозрасните гејмери дефинитивно се сеќаваат на гејминг сесиите со флеш игри преку интернет прелистувачите. Доколку сте и вие како нас, тогаш имињата како Armor Games и Kongregate будат бројни сеќавања. SoulGame Studio беше еден од пионерите на таа сцена, а сега, преку Swords & Souls Legacy Collection, нивните пет најпознати класици се враќаат во ново, модерно руво каде потребата за Flash Player-от е хирушки одстранета. Оваа колекција не е само обичен порт, туку внимателно реставриран пакет кој ги обединува Swords & Souls, Rogue Soul, Rogue Soul 2, The Soul Driver и The Gentleman во едно епско искуство.
Разновидност што плени
Играта која највеќе се истакнува е, без сомнение, Swords & Souls. Оваа игра е брилијантен хибрид помеѓу RPG и тренинг симулатор. Ликот со кој играте ги подобрува вештините преку серија забавни и интерактивни мини-игри. Секоја мини-игра е поврзана со одредена статистика – тренирате сила со сечење јаболка, агилност со избегнување проектили, и одбрана со блокирање удари. Потоа, овие вештини ги тестирате во арената, каде што се борите против сè посилни противници. Системот на прогресија е исклучително зависен; постојано отклучувате нова опрема, магии и таленти. Единствената потенцијална маана е што по долготрајно играње, некои од мини-игрите може да станат репетитивни, но желбата за надградба и победа знае да биде доволно силен мотиватор.
Rogue Soul и неговото продолжение Rogue Soul 2 ја носат колекцијата во жанрот на брзи runner платформери. Како вешт крадец, вие трчате низ улиците и покривите на градот, избегнувајќи стапици, собирајќи плен и елиминирајќи ги непријателите. Контролите се интуитивни и респонзивни, што овозможува флуидно движење и акробации. Додека првиот дел ги поставува темелите со солидна механика и многу содржина за откривање, Rogue Soul 2 го проширува светот со нови средини, покомплексни непријатели и предизвикувачки битки со босови. Иако можеби немаат RPG длабочина како Swords & Souls, овие две игри нудат чиста, адреналинска забава.
The Soul Driver ве става зад воланот и во хаотична бркотница со полицијата. Целта е да стигнете до границата додека избегнувате блокади, шилци на патот, па дури и хеликоптери. Играта има аркаден шарм, каде што успехот зависи од брзите рефлекси и паметното користење на надградбите за вашето возило. Иако е можеби наједноставната игра во колекцијата, таа служи како одлична промена на темпото и е совршена за кратки сесии на играње.
На крај, тука е The Gentleman, уникатна puzzle-платформер игра со стил. Во улога на вистински господин, опремен со чадор и препознатлива шапка, решавате паметни загатки кои често вклучуваат манипулација со гравитацијата. Играта бара повеќе размислување отколку рефлекси и се одликува со бројни паметно осмислени предизвици.
Визуелно, колекцијата успешно го пренесува шармот на оригиналните Flash игри во повисока резолуција, давајќи ви чист, јасен и шарен визуелен стил кој е верен на оригиналите.Звучната подлога е исто така носталгична. Музиката е составена од едноставни, но заразни мелодии кои лесно стануваат хитови на денот, вртејќи се во вашата глава и кога нема да ги играте игрите.
Да се каже дека Swords & Souls Legacy Collection е само збир на стари игри е потценување од епски размери. Колекцијата е инструмент за славење на една креативна ера во гејмингот, спакувана на начин кој е достапен и привлечен за модерната публика.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
