SkyDrive, Dropbox, Google Drive, iCloud… кое е најдоброто веб складиште?

Да бидам искрен, го обожавам Dropbox кој го користам веќе неколку години и никогаш не размислував на други веб складишта бидејќи имав неколку гигабајти, имав синхронизиран фолдер на десктоп и тоа ми беше доволно. Но, сега се појавија уште слични сервиси кои ме ставија на мисла бидејќи се од поголеми компании и се интегрирани со други сервиси и нудат нешто повеќе од само складирање фајлови на веб.

Аpple го претстaви iCloud кој е поврзан со iTunes. Мicrosoft го надогради SkyDrive, а од вчера Google го претстави Google Drive кој е интегриран со Docs. Amazon си претстави Cloud Drive кој е интегриран со нивната продавница. Покрај овие постојат SugarSync кој дозволува повеќе компјутери да бидат поврзани со исти фолдери, и Box кој понуди 50 GB простор за Android. И секако тука е Dropbox.

Како што гледате, има куп сервиси од различни компании, сите со различни опции, но сите исти во својата функционалност – тие обезбедуваат личен простор од неколку гигабајти на веб каде што може да закачите фајлови на кои може да им пристапите од било каде. И сите имаат мобилни апликации.

Тогаш, кој е правиот сервис за вас? Најважното е секако колку простор нудат и за колку пари. Еве како се споредуваат. Ќе започнеме со најновиот:

• Google Drive нуди 5 GB бесплатен простор, се доплаќа 2,5 или 5 долари месечнo за 25, односно 100 GB, или 50 долари месечно за еден терабајт. Големите компании може да купат максимално 16 терабајти за 800 долари месечно. Има десктоп интеграција со Windows и Mac, интеграција со Google Docs за соработка. Може да се закачи фајл со лимит до 10 GB.
• Dropbox дава бесплатни 2 GB кои со промоции можат да бидат 18 GB, се плаќа 10 долари месечно за 50 гигабајти, или 20 долари за 100 гигабајти. Има интеграција со десктоп, интеграција со Facebook и е едноставен за користење. Може да се закачи фајл со лимит до 300 MB преку прелистувач, нема лимит преку десткоп.
• Microsoft SkyDrive има бесплатни 7 GB, 10 долари годишно за 20 GB, 50 долари годишно за 100 GB. Има десктоп интеграција за Windows и Мac, и можност за соработување на фајлови преку Office Live апликациите. Лимит на фајл е 2 GB.
• Apple iCloud доаѓа со бесплатен простор од 5 GB, се плаќа 20 долари годишно за 10 GB, 100 долари за 50 GB. Дополнителниот простор е малку поскап од другите, но се работи за складиште кое е интегрирано во iOS 5 и iTunes, купената музика се појавува веднаш во iCloud. Ова веб складиште e наменето пред се за уредите на Apple. Има и апликација за Windows 7.
• SugarSync нуди 5 GB бесплатен простор, 5 долари месечно за 30 GB простор, 10 долари за 60 GB и 15 долари месечно за 100 GB простор. Нема лимит на големината на фајлот. Тоа што е уникатно за SugarySync е можност да се синхронизираат неколку различни уреди, вклучувајќи синхронизирање PC со Мac, што го прави овој сервис добар за соработка.
• Box dava 5 GB бесплатен простор, 10 долари месечно за 25 гигабајти, 20 долари за 50 GB. Има многу мал лимит на големи на фајлови од само 25 MB за бесплатните профили, или 1 GB за тие што плаќаат. Бизнис пакетите добиваат повеќе простор и имаат можност за статистика и следење на фајловите, десктоп синхронизација, интеграција со Google Apps, чување на верзии итн.
• Ubuntu One нуди бесплатни 5 GB, и 20 GB за 30 долари годишно. Ubuntu One е поврзан со Music Streaming сервисот кој нуди стримање на музика од била каде и било кој уред. Music Streaming има 20 GB за околу 4 долари месечно. (фала @goranAT)
• Amazon Cloud Drive нуди 5 GB бесплатен простор и е поврзан со Cloud Player за Android, како и со продавниците за симнување музика. Се плаќа по 1 долар годишно за секој дополнителен GB. За жал, пристап до продавницата е дозволен само во САД.