Владата го одобри, и сега е ред на Собранието да го прифати Предлог-Законот за управување со отпадна електрична и електронска опрема, односно оваа регулатива ќе треба да се справи со е-отпадот, со старите и неупотребливи компјутери, телевизори, шпорети…
Според проценките на Министерството за животна средина, во 2009-та се генерирани околу 12.000 тони отпад од електрична и електронска опрема, и според проценките за 5 години овој отпад ќе се зголеми за 16-18 отсто, а за 12 години ќе биде двојно зголемен.
Со Предлог-Законот (кој може да го читнете подолу) властите ќе се обидат да го намалат волуменот на e-отпад со:
- информирање на граѓаните и компаниите како да се справат со него;
- рециклирање и унапредување на стандардите на заштита на животната средина;
- забрана на токсични супстанци и унапредено справување со нив;
- правилно означување на опремата со цел да се собира одделено од несортираниот комунален отпад;
- креирање и развој на пазар за повторни употреби и преработки.
Законот е изработен во билатералната соработка со Република Словенија и е во рамките на националната програма за усогласување со правото на Европската Унија, со што се врши усогласување со директивата за отпадна електрична и електронска опрема.
