Сакаме вредност пред да мислиме на профит

{mosimage}Google ќе го купи Twitter. Оваа шпекулација дека двете компании се договараат за аквизиција на сервисот за микро-блогирање се појави вчера на TechCrunch.com. Влијателниот ИТ блог наведе 3 извори блиски до Google или Twitter кои им ги дале таа информации. Но, потоа следеа надополнувањата дека тоа не е точно.

Кара Свишер од исто така влијателен ИТ блог BoomTown на AllThingsDigital го негираше тоа со уште неколку извори. Според нејзините извори Google и Twitter „дискутирале само за одредени продукти, за crawling-от на Google и за пребарувањето во вистинско време (real-time search)“.

Оваа приказна ги возбуди сите медиуми и блогови, кои повторно ја отворија дискусијата дека Twitter треба да го купи некој, дека е потребен бизнис модел за сервисот кој е најновото и најинтересното нешто со голем потенцијал. Дури имаше и текстови зошто Google треба да го купи Twitter и како да го искористи.

Но додека се ширеше шпекулацијата на интернет, на вчерашното издание на The Colbert Report, комични вести на Comedy Central каналот, Стивен Колберт направи интервју со Биз Стоун, ко-оснивачот на Twitter.

„Сакаме прво да изградиме вредност, да се прошириме, па потоа ќе бараме начини како да профитираме од тоа“ рече Биз Стоун кој на прашањето на Колберт „Како се чуствуваш како угледен твит?“ одговори „Се чувствувам моќно“.

Нормално дека се чуствува моќно кога Google, Facebook, Microsoft … се врткаат околу Twitter и кога целиот свет е заинтересиран за микро-блогирањето. Можеби Google нема да го купи Twitter сега, или можеби некој друг или пак никој нема да го има Тwitter, кој пак има потенцијал да се изгради во сопствена компанија која ќе се бори со другите гиганти за светска доминација.

Градењето на вредност е одлична стратегија. Стоун во интервјуто вели дека имаат стрпливи инвеститори кој знаат што значи таа вредност. Имено Facebook лани понуди 250 милиони за да го купи Twitter кој ја одби понудата. Досега вредноста на сервисот се зголеми. Со вакви шпекулации и вести Twitter си доби одлична промоција, има повеќе корисници, повеќе идеи за развој на културата на микро-блогирањето…

Twitter е интересна тема и не е чудно што сите се заинтересирани за неговата иднина, но додека ја откриеме погледнете го одличното интервју на The Colbert Report.