А1 Македонија, во соработка со Министерството за внатрешни работи, денес официјално ја претстави националната општествено одговорна кампања под слоганот „Одговорно со технологијата“. Иницијативата има за цел подигнување на јавната свест за ризиците од користењето мобилни телефони и за дигиталната дистракција во сообраќајот.
Кампањата е насочена кон сите учесници во сообраќајот – возачи, пешаци, велосипедисти и корисници на електрични тротинети – и ја адресира темата за одговорно однесување во ера во која мобилните уреди се неразделен дел од секојдневието. Според организаторите, централна порака на кампањата е дека ниту еден телефонски повик или нотификација не вреди колку човечкиот живот.
Телефонски број како централен симбол
Во основата на креативниот концепт стои телефон што ѕвони, но останува без одговор – симбол на повик кој никогаш нема да биде возвратен. Преку пораката „Јави се и слушни“, иницијативата активираше телефонска линија преку која граѓаните можеа директно да ја слушнат пораката што стои зад кампањата.
Од А1 Македонија соопштија дека за неколку дена телефонскиот број од кампањата бил завртен илјадници пати, а содржината предизвикала значителен број реакции, споделувања и коментари на социјалните мрежи.
Изјави на партнерите
Главниот извршен директор на А1 Македонија, Методија Мирчев, истакна дека компанијата чувствува одговорност да иницира општествени теми преку својата комуникација. „Технологијата треба да нè поврзува, а не да нè оттурнува од она што е најважно, а тоа е човечкиот живот и безбедноста“, изјави Мирчев, нагласувајќи дека реакциите потврдиле оти пораката стигнала до јавноста.
Министерот за внатрешни работи, Панче Тошковски, ја оцени соработката како значајна и потенцира дека безбедноста во сообраќајот е заедничка одговорност. Според него, стратешките партнерства меѓу институциите и приватниот сектор можат да создадат силен општествен импакт и да поттикнат промена на навиките кај граѓаните.
Бранкица Толевска од одделот за бизнис-трансформација, корпоративна стратегија и комуникации во А1 Македонија објасни дека неконвенционалниот пристап со активирана телефонска линија бил избран намерно. „Граѓаните имаа можност директно да ја почувствуваат емоцијата и тежината на моментот кога еден повик останува неодговорен засекогаш“, изјави Толевска.
Продолжување на активностите
Според објавеното, кампањата „Одговорно со технологијата, за побезбеден сообраќај“ ќе продолжи и во наредниот период преку повеќе активности и комуникациски канали. А1 Македонија и МВР најавуваат дека целта е долгорочно подигнување на свеста и поттикнување промена во однесувањето на сите учесници во сообраќајот.
Темата за дигитална дистракција во сообраќајот веќе подолго време е предмет на анализи и кампањи на меѓународно ниво, особено со растечкото присуство на паметни уреди и нотификации во секојдневието на возачите.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
