Microsoft продолжува со проширување на своето портфолио на видеоигри. Во зделка вредна 68,7 милијарди долари компанијата сега е сопственик на еден од најголемите издавачи на видеоигри Activision Blizzard. Ова е најголема аквизиција на Microsoft во историјата на компанија. Activision Blizzard е трет по големина издавач на видеоигри веднаш зад Tencent и Sony.
„Ќе додадеме колку можеме повеќе игри од каталогот на Activision Blizzard во Xbox Game Pass и PC Game Pass, и нови наслови, и игри од неверојатниот каталог на Activision Blizzard“, вели директорот на Microsoft Gaming, Фил Спенсер на блогот нa Xbox.
Со аквизицијата на Activison Blizzard, Microsoft доби импресивно портфолио на видеоигри (Call of Duty, Warcraft, World of Warcraft, StarCraft, Diablo, Overwatch), но и мобилниот хит Candy Crush. Blizzard секако е студиото кое издаде дел од најпрепознатливите игри, но веќе поодамна основачите на компанијата и луѓето кои ги креираа првите игри го напуштија Blizzard и работат на нови проекти.
Microsoft најави дека портфолиото на Activision Blizzard ќе биде додадено во Microsoft Game Pass. Сервисот веќе има 25 милиони претплатници, но игрите на Activision Blizzard секој месец ги играат 400 милиони корисници, па ова ќе биде интересен развој на настаните. По завршувањето на зделката Microsoft во својот гејминг оддел ќе има 30 интерни студија за развој на видеоигри. На чело на Activision Blizzard останува досегашниот директор Боби Котик, но отсега ќе работи под Фил Спенсер, директорот на Microsoft Gaming.
Ова е четврти пат последниве неколку години Microsoft значително да го прошири своето гејминг портфолио. Досега ги додаде Mojang (Minecraft); Obsidian Entertainment (Fallout: New Vegas, Alpha Protocol, Pillars of Eternity 1 и 2); Ninja Theory (Hellblade, DmC); Playground Games (Forza Horizon); Undead Labs (State of Decay); Compulsion Games (Contrast, We Happy Few). Пред Activision Blizzard, Microsoft „потроши“ 7,5 милијарди долари на ZeniMax Media, издавачот на The Elder Scrolls, Fallout, Doom, Quake, и Dishonored.
Окрупнување на мобилниот пазар
Ова е втора голема зделка во гејминг индустријата на почетокот на 2022 година. Минатата недела Take-Two го купи гигантот во креирањето на игри за мобилни телефони Zynga. Компанијата плати 12,7 милијарди долари во кеш и акции. Заедно со Zynga доаѓаат и 168 милиони играчи кои секој месец ги играат игрите на Zynga.
„Take-Two поседува огромен каталог на успешни наслови за конзоли и компјутери, со лојална заедница на играчи, и постои можност да се креираат мобилни игри и нови cross-platform искуства за многу од нив.
Zynga има речиси 3000 вработени вклучувајќи и исклучително талентирани девелопери за мобилни игри, кои ќе го отворат патот за Take-Two да ја забрза оваа стратешка иницијатива и да ги престави овие легендарни игри на најбрзо-растечката платформа во индустријата“, велат од Take-Two.
Take-Two e препознатлив по куп наслови за конзоли и PC (Grand Theft Auto, Red Dead Redemption, Civilization, Borderlands, BioShock), но кога игрите за мобилен се во прашање, Take-Two баш и не се препознатливо име. Минатата година Take-Two за 378 милиони долари го купи најголемото гејминг студио во регионот, српската компанија Nordeus.
Слично како и Take-Two и Microsoft е во потрага по присуство на пазарот за мобилни, иако компанијата е во потрага и по ексклузивни наслови за својата Xbox конзола. Пазарот на мобилни видеоигри во 2020 година беше проценет на над 200 милијарди долари. Како дел од аквизицијата Microsoft ќе ги добие и King Games, креаторите на Candy Crush. Activision Blizzard во 2015 плати 5,9 милијарди за ова гејминг студио. Во мобилниот дел на пазарот ќе ја добијат и Call of Duty: Mobile.
Во минатото Microsoft се откажа од телефоните како хардвер, сепак компанија преку софтвер и сервиси и натаму, и тоа многу успешно, е застапена на пазарот. Софтверот кој го произведува е достапен и на iOS и на Android, а по се изгледа наскоро ќе „нападнат“ и со игри.
Им доаѓа ли крај на проблемите на Activision Blizzard
„Зделката ќе донесе нова ера за гејмингот која се фокусира на играчите и креаторите на содржина и ќе го направи играњето на видеоигри безбедно“, вели директорот на Microsoft Сатја Недела.
Activision Blizzard последните неколку години беше во фокусот на медиумите, но не поради видеоигрите кои ги издаваа. Минатата година ја одбележаа серија протести на вработените и судски спорови за негување на култура на „постојано сексуално вознемирување“. Од јули од компанијата се отпуштени триесетина вработени, а против 44 се водела дисциплинска постапка. Компанијата собрала над 700 поплаки за недолично однесување на работното место, јави Wall Street Journal.
Скандалите дојдоа и до врвот на компанијата, а директорот Боби Котик е обвинет дека помагал да се скрие недоличното сексуално однесување и дури му се заканил на својот асистент. И покрај најавата дека останува на чело изгледа тешко да се поверува дека Котик ќе остане на врвот на компанијата по целосното завршување на аквизицијата.
Иако директно немаше осврнување за скандалите, Фил Спенсер од Microsoft Gaming во еден дел го објасни ставот на компанијата:
„Како компанија Microsoft е посветен на инклузивност во секој аспект на гејмингот, вклучувајќи ги вработените и играчите. Длабоко ја цениме индивидуалната културата на секое од студијата. Веруваме дека креативниот успех и автономијата одат заедно со однесувањето на сите со достоинство и почит. Одговорноста за ова е кај сите тимови и лидери“, вели Спенсер.
Во ноември 2021 година по скандалите во Activision Blizzard, Microsoft објави дека ги разгледува сите аспекти во односот со оваа компанија. Тоа што тогаш не го знаевме е дека еден од можните чекори е купување на компанијата.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
