EmbedSocial 
Админ-панелот на кој стои бројка од 400 000 корисници е еден од моментите кој секој стартап го сонува. За тимот на EmbedSocial и Марија Влашчева, овој огромен чекор неодамна стана реалност. За Марија е неверојатен осумкратен раст од моментот кога таа се приклучила на компанијата.
За оние кои можеби првпат се среќаваат со брендот, EmbedSocial е моќна all-in-one платформа за менаџирање на корисничка содржина (UGC) и менаџирање на Google Business профили, креирана специјално за дигитални агенции и брендови со повеќе локации. Преку API интеграции, платформата им овозможува на бизнисите автоматски да собираат и прикажуваат содржини од мрежи како Instagram, Facebook, X, YouTube и Google. Резултатот на ова се различни паметни виџети кои се претвораат во продажни алатки и ја зголемуваат довербата.
Импресивниот скок од 50 000 на 400 000 корисници, и листата на клиенти како Mercedes-Benz, Samsonite и Emirates, е приказна за брза адаптација, учење во од и градење на силен тим. Иако вештачката интелигенција се користи за сè и сешто, EmbedSocial ја користи за да го направи својот производ попаметен, а остануваат доследни на својата основна вредност: без лажни рецензии и комплетна автентичност.
Во интервјуто со Марија, зборуваме за „маките“ на секое ново ниво на раст, како се менаџира креативниот хаос во SaaS индустрија, балансирањето помеѓу малите продавници и корпорациите, и зошто скалирањето е секогаш повеќе приказна за луѓето, отколку за самиот производ.
Скокот од 50 000 на 400 000 корисници не се случува преку ноќ. Можеш ли накратко да раскажеш приказната за тоа како се случи овој раст и како го доживеавте во EmbedSocial?
Преку ноќ не 😄 Но, кога сега ќе погледнам наназад, мене ми изгледа како да се случило преку ноќ.
Секако, овој раст не e резултат на еден магичен момент, туку на илјадници, константни подобрувања: подобар производ, подобра поддршка за корисниците, подобар onboarding, подобра SEO стратегија, повеќе интеграции и многу, многу разговори со корисници. И тоа ни е секојдневие. Често знаеме да пробуваме нови работи и да тестираме, без да се плашиме од грешки. Верувам дека тоа е најбитно за ваков раст, цело време се обидуваме да бидеме подобри.
Можеби однадвор изгледа како експлозивен раст, но овие бројки се резултат на повеќе години конзистентна работа и решавање на проблеми за корисниците.
Во твојата објава спомена дека и 50 000 корисници на почетокот изгледале како огромен успех. Како се менуваше „mindset“-от како што бројката се зголемуваше за 8 пати?
Да, на почетокот го славевме секој нов клиент. Потоа почнавме да размислуваме за процеси. Тогаш сфативме дека најголемиот предизвик не е да добиеме нови корисници, туку да обезбедиме секој од тие стотици илјади корисници да има добро корисничко искуство. Така се менуваше и целиот начин на размислување и пристап кон проблемите. Почнавме со прашањето како да изградиме нова функционалност, а подоцна истото се развиваше кон како да изградиме систем што ќе функционира на многу поголемо ниво.
Кога имаш 50.000 корисници, падот на системот е проблем. Но, кога имаш 400.000, падот на системот е глобална криза за илјадници бизниси. Тоа е сосема друга тежина. Искрено, многу поубава тежина.
Како тим, научивме да не се плашиме од големите бројки, туку да ги почитуваме и да градиме системи кои можат да го издржат тој притисок.
Дали може да процениш кој беше клучниот момент кога сфативте дека EmbedSocial станува глобален сервис кој го користат брендови како Mercedes-Benz и Emirates?
Aко морам да издвојам, тоа беше првиот пат кога видовме име на бренд меѓу првите 50 на листата од Fortune 500 во нашиот админ панел (за жал поради нивни политики не можам да го именувам). Притоа, никој од нас не го продаде тоа лично. Тие не нè нашле преку реклама или преку тим за продажба. Нè пронајдоа затоа што решаваме реален проблем, доволно добро за некој во маркетинг тимот на огромна корпорација да каже дека ова е баш таа алатка што им треба. Потоа добивме и брендови како што се Mercedes-Benz, Emirates или Samsonite.
Често добиваме коментари од корисници и партнери, па и нови вработени, кои претпоставуваат дека сме компанија од САД. Кога ќе им кажеме дека целиот производ се гради од Македонија, обично следува мало изненадување. 😄
Искрено, тоа ни претставува посебна гордост, затоа што покажува дека квалитетот, професионалноста и глобалниот пристап денес се препознаваат многу повеќе од локацијата на канцеларијата.
За нас тоа е и дополнителна мотивација, да покажеме дека од Македонија може да се создаваат производи и услуги кои секојдневно ги користат стотици илјади корисници и некои од најпознатите брендови во светот. Тоа е добро не само за нас како EmbedSocial, туку и за целата локална startup сцена. Јас лично сметам дека во Македонија постојат вистински таленти и професионалци и често одбирам да соработувам со луѓе од кај нас.
Растот од 8 пати значи и огромен прилив на фидбек од корисниците. Како одбирате што е навистина важно да се додаде како опција без да го оптоварите производот и да ја задржите неговата едноставност?
Одлично прашање. Задржувањето на едноставноста е најтешката битка за SaaS. Секое барање од корисник звучи разумно само за себе. Проблемот е што стотина разумни „да“ прават еден неупотреблив производ.
Филтерот што го користиме е доста тежок во пракса, но за нас функционира. Не е прашање дали некој го бара ова, туку колку корисници ќе бидат блокирани ако го нема. Едно барање што го споменал еден корисник е желба. Истото барање што доаѓа од триесет различни индустрии е добар сигнал. На почеток е тешко, но со искуство и овој принцип зајакнува.
Во овој дел и вештачката интелигенција ни помогна многу. Креиравме AI Editor со кој, наместо да додаваме педесет нови опции, корисникот може со едноставен опис (prompt) да си го создаде виџетот каков што го замислил. На овој начин корисникот секогаш гледа едноставен продукт.
„Секое ново ниво доаѓаат сосем нови маки“. Дали има некоја ситуација каде што си помисливте „готово, го решивме ова“, за по неколку месеци да сфатите дека на новото скалило е целосно променета?
Многу често. Кога ќе решиш проблем за 50 000 корисници, многу често сфаќаш дека на 400.000 корисници тоа веќе не е истиот проблем. Инфраструктурата, поддршката, процесите, анализата, сè добива нова димензија.
На пример, onboarding-от и менито ги менуваме често. Од прикажување на буквално сите функционалности се префрливме на само неколку, така што секој корисник ги гледа само тие кои ги користи најчесто. Со AI сега можеме да направиме точна анализа кој е клиентот, кои проблеми можеме да ги решиме и да го редиректираме на точниот дел во продуктот, да не мора да прабарува сам. Но, верувам дека и ова наскоро ќе се смени, може следно ќе биде говорно креирање widget-и.
Истото е во делот за грижа на корисници. Работиме со различни јазици, различни култури и различни потреби на бизниси. Пред некое време сите ни се обраќаа на англиски јазик, сега секој зборува на својот и очекуваат и дека нашата поддршка, како и самите виџети ќе бидат на тој јазик. Така што и ние мораме да се приспособиме на нивните очекувања.
Ова е една од најголемите лекции за скалирање, дека не постојат трајно решени проблеми. Постојат само проблеми решени за моменталното ниво. За среќа, имаме тим кој ги прифаќа како предизвик.
Во последните две години производот, процесите и тимот мораа да еволуираат многу побрзо од очекуваното. Како се справувавте со тој притисок на брза адаптација без да се изгуби фокусот и квалитетот?
Би рекла со многу подобра анализа на приоритети, повторно со помош на вештачка интелигенција. Кога растот е брз, можеш да се изгубиш во долга листа на идеи и барања. Затоа научивме многу почесто да кажуваме не, дури и на големи корпорации.
На бројка од 400 000 корисници фокусот не е во тоа колку работи правиш. Фокусот е во тоа колку работи одлучуваш да не ги правиш. Но, сепак имаме дефинирано неколку работи кои не ги компензираме под никаков притисок. За нас тоа се квалитетот на платформата, односот кон корисникот и автентичноста на содржината.
Твојот заклучок е дека скалирањето е подеднакво поврзано со луѓето и егзекуцијата, колку и со самиот производ. Како се менуваше културата во EmbedSocial за да го поддржи овој раст? Како успеавте да го задржите стартап-духот во многу поголем тим?
Апсолутно. Според мене, стартап-духот не е во бројот на луѓе, туку во начинот на кој се одлучува. Ние работиме во мали тимови така што секој е автономен и може да одлучи сам. Кај нас културата е таква што колегите кои се најблиску до проблемот имаат право да го решат, без да чекаме два состанока и три одобренија. Најчесто доаѓаме на состанок со што имаме направено/поправено, ако сметаме дека постоечкото решение не е доволно добро, а не дали воопшто ќе смееме да го разгледаме. Тоа се гради и менува со искуство.
Во тој процес изградивме одговорност како што растеме сите заедно. Се зголеми вербата дека добрите идеи можат да дојдат од секого во тимот. И тоа е подобро од било која бенефиција.
Како се менуваше твојата улога во компанијата низ овие фази? Што мораше ти лично да „научиш“, а што да „одучиш“ (unlearn) за да бидеш ефективен лидер на овој следен левел?
Во EmbedSocial сменив неколку работни позиции, некои од нив не постоеја претходно, па се прилагодував на промените. Прво целосно бев насочена кон грижа за корисниците, потоа во градење на продуктите, па на тимот и процесите. Сега работам сѐ заедно и полесно е да донесеш одлука кога ја имаш целосната слика и од блиску ги познаваш потребите на секоја работна позиција.
На почетокот многу работи зависат од основачите и првите луѓе во тимот. Со тек на време, морав да научам да градам процеси наместо постојано да гасам пожари и да поставувам повеќе и подобри прашања, наместо да брзам со одговор.
А што морав да одучам, веројатно навиката дека ако сакам нешто да биде направено како што треба, морам сама да го направам. Сега знам да се тргнам на страна зашто имам тим на кој целосно можам да се потпрам.
Кога компанијата расте толку брзо, постои опасност „работата да го голтне човекот“. Како балансираше помеѓу интензивното темпо на раст и твојот приватен живот, за да го задржиш ентузијазмот и да го избегнеш „burnout“ ефектот?
Ова ќе го одговарам за сите што ме прашуваат „Што работиш ти па толку често патуваш?“, а потајно се убедени дека ништо не работам. 😄
Не знам дали има совршена формула, ама кај мене во вокабулар зборот burnout не постои. Верувам дека не доаѓа од многу работа, туку од работа без смисла и од чувството дека сè зависи само од тебе. Најдобрата одлука што ја донесовме беше да изградиме тим на кој можеме целосно да се потпреме.
Во компанијата имаме голема флексибилност, неограничен одмор и разбирање за приватниот живот. Кога има лансирање на нов продукт или поголем проблем, останувам додека не се реши, но тоа лесно го балансирам подоцна.
Затоа во последните 6 и пол година слободните денови ги користам за патувања и време со семејството, а не за одмор од работа. Патувањето ми е пасија и, бидејќи работиме remote, често спојувам работа и патување од различни земји, на пример Јапонија, Германија, Италија, Грузија. Тоа ми е дополнителна мотивација да бидам попродуктивна и да уживам во нови места после работното време. 😄
Во ера на AI и лесно генерирана содржина, најважна вредност во EmbedSocial е нула лажни рецензии (zero fake reviews). Колку е тешко денес да се одбрани автентичноста на UGC и колку оваа битка е клучна за довербата на корисниците?
Tокму затоа станува уште поважна. Како што интернетот се полни со генерирана содржина од вештачка интелигенција, автентичните искуства од реални луѓе стануваат сè повредни.
Од самиот почеток велиме дека EmbedSocial не е продукт за креирање виџети, туку за креирање доверба. Виџетите се само начинот на кој таа доверба станува видлива на веб страницата.
А во ера кога секој може да генерира илјада совршено напишани рецензии за пет минути, автентичноста стана најретката валута на интернет. Лажна рецензија е како лажни пари, функционира додека сите не сфатат дека целиот систем е компромитиран, а тогаш брендот страда неповратно. Затоа, за нас „zero fake reviews“ не е маркетинг слоган, туку принцип. Сакаме секоја рецензија што корисниците ја прикажуваат преку нашите виџети да дојде од вистински човек со вистинско искуство.
Кога клиенти како Samsonite или локални мали продавници избираат EmbedSocial, што е она што најмногу го ценат во вашите виџети и производ? Како правите избор помеѓу потребите на малите бизниси и гигантските корпорации?
Интересно е што и голем бренд и мала продавница на крајот сакаат иста работа, а тоа е да изгледаат веродостојно пред својот купувач. Samsonite сака посетителот да почувствува сигурност пред да купи куфер, а локалната продавница за храна го сака истото чувство пред нејзиниот сосед да влезе и да купи јаболка. Психологијата на довербата е универзална, се менува само размерот.
Она што и едните и другите го ценат најмногу е дека работите едноставно функционираат, брзо се вградуваат, не го успоруваат сајтот, изгледаат убаво и не бараат програмер за секоја измена. Никој не сака да мисли на технологија, сите сакаат резултат.
Како балансираме? Правиме еден производ со различни длабочини. Малиот бизнис се најавува, создава виџет за неколку минути и ги гледа резултатите во бројот на продажби. Големата корпорација навлегува подлабоко, користи API, менаџира повеќе локации и социјални платформи од исто место, има повеќе тимови, креира автоматски различни дизајни за различни пазари. Тоа е истата платформа, само ја надградуваме.
За крај, мораме да те прашаме за П.С.-от во објавата. Дали Никола Бојков сè уште го рефрешира админ панелот на секои 5 минути и по надминати 400.000 корисници? Дали таа пасија е „тајниот зачин“ на успехот?
Хаха мислам дека почна да рефрешира на 7, но сега очекува да види 500.000 корисници 😄
Искрено, ова не е само статистика и зад овие бројки стојат реални луѓе и бизниси и мотивот е ист од првиот ден, да успееме да ги задржиме да ни веруваат и понатаму. Пасијата кон овој производ не престанува на оваа бројка, ако имаме среќа, ќе стане уште поголема.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
